नेकपा एमालेका महासचिव शंकर पोखरेलले नेकपा एमाले सरकारमा पुगे पनि मिसन ०८४ को अभियान प्रभावित नहुने बताएका छन् ।

अहिलेको सहकार्य वामपन्थी मोर्चातर्फको यात्रा नभएको उनको भनाइ थियो । 

नेकपा एमाले बागमती प्रदेश कमिटीको बैठकलाई मंगलवार पार्टी केन्द्रीय कार्यालय च्यासलमा सम्बोधन गर्दै पोखरेलले सत्तामा सहकार्यसँगै एमालेले वैचारिक राजनीतिक प्रतिस्पर्धा गरिरहने बताएका हुन् । 

‘सरकारमा पुगेको कारणले गर्दा मिसन ०८४ के भयो भन्ने जिज्ञासा साथीहरूमा देख्ने गरेको छु । कौतुहलता र टिप्पणी गरेको भेट्छु । अहिले गरेको सहकार्य मिसन २०८४ साई सहयोग पुर्‍याउने गरी गरेका छौं’, पोखरेलले भने, ‘अहिलेको सरकार वामपन्थी सरकार होइन, यो सहकार्य न्यूनतम साझा प्राथमिकता र साझा संकल्पको आधारमा भएको हो । जे हो त्यही रूपमा बुझ्नु पर्छ । वामपन्थी मोर्चातर्फको यात्रा होइन, उद्वेलित वा प्रभावित हुनुपर्ने आवश्यकता छैन ।’

पोखरेलले नेकपा एमाले समाजवादी मोर्चा या कुनै खालको मोर्चा बनाउने पक्षमा नरहेको बताए । ‘राजनीतिक ध्रुवीकरणमार्फत पार्टी प्रवेश गराउने कुरा जारी राख्न पर्छ । सरकारमा रहेका दलसँग सहकार्यसँगै वैचारिक राजनीतिक प्रतिस्पर्धा गरिरहेका छौं’, पोखरेलले भने ।