नेकपा माओवादी केन्द्रले उपनिर्वाचन र प्रदेश सरकार गठनबारे छलफल गर्न पार्टीको पदाधिकारी बैठक बोलाएको छ ।

बुधवार बिहान ८ बजे प्रधानमन्त्री निवास बालुवाटारमा बस्ने गरी बैठक बोलाइएको प्रधानमन्त्री पुष्पकमल दाहालको सचिवालयका एक सदस्यले जानकारी दिए ।

‘उपनिर्वाचन र प्रदेश सरकारको विषयमा छलफल गर्न पदाधिकारी बैठक बोलाइएको हो’ प्रधानमन्त्री स्रोतले भन्यो । 

इलाम २ मा एमाले स्वर्गीय सुवास नेम्वाङका छोरा सुहाङलाई उम्मेदवार बनाएको छ । माओवादीमा पनि पार्टीको तल्लो तहबाट उम्मेदवार सिफारिस भएर आएका छन् । तर माओवादीले एमाले उम्मेदवारलाई नै समर्थन गरेर जाने तयार गरेको माओवादी स्रोतको दाबी छ ।

‘तलबाट माओवादी उम्मेदवार सिफारिस भएर आउनुभएको छ । तर एमालेकै उम्मेदवारलाई समर्थन गर्ने स्थिति बन्छ’, माओवादी स्रोतले भन्यो ।

प्रदेश सरकारतर्फ कोशीमा एमाले, मधेशमा जसपा, सुदुरपश्चिममा नागरिक उन्मुक्ति पार्टीले मुख्यमन्त्री लिने समझदारी भएको पनि बालुवाटार स्रोतको भनाइ छ ।

बाँकी प्रदेशमा पनि गठबन्धनका दलबीच मुख्यमन्त्री सहमतिमा मिलाउने तयारी माओवादीका नेताहरू बताउँछन् ।

केही प्रदेशमा निर्णायक रहेको नेकपा एकीकृत समाजवादीलाई पनि आलोपालोमा मिलाएर जाने तयारीमा प्रधानमन्त्री रहेको बालुवाटार स्रोतको भनाइ छ ।