अध्यक्ष केपी शर्मा ओलीको गृहजिल्ला झापामा नेकपा (एमाले)को नेतृत्व छनोट चुनावी प्रक्रियाबाट गरिने भएको छ । अध्यक्ष ओलीले सर्वसम्मत नेतृत्व चयन गर्न निर्देशन दिएपनि झापाका नेता–कार्यकर्ताले त्यसलाई नमानेपछि चुनावी प्रक्रिया अगाडि बढाइएको छ । 

अध्यक्ष ओलीले उद्घाटन सत्रमा एमाले झापाका कार्यवाहक अध्यक्ष प्रेम गिरीलाई अध्यक्ष बनाउन खुल्ला मञ्चबाटै भनेका थिए । सचिव शिव ढुङ्गेल दाबीबाट पछाडि नहटेपछि झापामा एमालेको जिल्ला अधिवेशन रोचक बनेको छ । 

दुई जनाबीच सहमति हुन नसकेका कारण शुक्रवारका लागि तोकिएको उम्मेदवार मनोनयनको कार्यतालिका प्रभावित भएको बनेको छ । निर्वाचन समितिले शुक्रवार दिउँसो २ बजेदेखि ३ बजेसम्मका लागि उम्मेदवारको दरखास्त फारम वितरण गर्ने र साढे ३ बजेदेखि बेलुका ७ बजेसम्म उम्मेदवारको दरखास्त फारम दर्ताको समयावधि तोकेको थियो । तर सहमतिका लागि भन्दै शुक्रवारको कार्यतालिका शनिवार बिहानका लागि सारिएको जनाइएको छ ।  

निर्वाचन समितिले शनिवार बिहान ९ बजेदेखि उम्मेदवारी दर्ताको समयावधि तोकेको छ । पार्टी अध्यक्ष ओलीले ढुङ्गेल बाहेकका नेताको नाम राखेर पदाधिकारी घोषणा गरेको भन्दै झापाका कार्यकर्ताहरू रुष्ट बनेका छन्  । 

यद्यपि, नेतृत्वले सर्वसम्मत ढङ्गले पार्टी समिति घोषणा गरेको भन्ने विषय आफूलाई थाहा नभएको ढुङ्गेलले बताए । आफू प्रतिस्पर्धाको लागि तयार भएर बसेको उनको भनाइ छ । 

बिहीवार जिल्ला अधिवेशनको उद्घाटन गर्दै पूर्वप्रधानमन्त्रीसमेत रहेका अध्यक्ष ओलीले सर्वसम्मत चयन नेतृत्व गर्न निर्देशन दिएका थिए । गिरीको नेतृत्वमा उपाध्यक्षमा असारू राजवंशी र सचिवमा तुलसी कार्कीको नाम लिइएपछि ढुङ्गेल पक्ष रुष्ट बनेको हो ।