सर्लाही जिल्ला अदालतले ‘लिटल बुद्ध’ भन्ने तपस्वी रामबहादुर बम्जनको मुद्दामा तीन हप्ता भित्र बहस नोट पेश गर्न आदेश दिएको छ ।

न्यायाधीश फणिन्द्रप्रसाद पराजुलीको एकल इजलासले बुधवार दुवै पक्षको सुनवाइपछि यस्तो आदेश दिएको हो ।

सर्लाही जिल्ला अदालतका स्रेस्तेदार सदन अधिकारीका अनुसार आगामी तीन हप्ता भित्र दुवै पक्षबाट बहस नोट पेश गर्न आदेश भएको हो ।

गत पुष २६ गते सर्लाही जिल्ला अदालतका न्यायाधीश विष्णुप्रसाद रेग्मीको इजलासले बम्जनलाई थुनामा राखी मुद्दाको पुर्पक्ष गर्न आदेश दिएको थियो ।

उक्त आदेशपछि उनी महोत्तरीको जलेश्वरस्थित कारागारमा थुनामा छन् ।

आश्रममा आएका अनुयायीलाई यौन हिंसा गरेको र बेपत्ता बनाएको अभियोग बम्जनमाथि छ ।