अख्तियार दुरुपयोग अनुसन्धान आयोगले वाइडबडी विमान खरिदमा तत्कालीन संस्कृति, पर्यटन तथा नागरिक उड्डयनमन्त्री तथा हाल कर्णाली प्रदेशका प्रदेशसभा सदस्य जीवनबहादुर शाहीविरुद्ध १ अर्ब ४७ करोड १० लाख ८५ हजार ४८२ रुपैयाँ बिगो कायम गरी बिहीवार भ्रष्टाचार मुद्दा दायर गरेको छ ।

विमान खरिद कार्य प्रचलित सार्वजनिक खरिद ऐन र सोअन्तर्गत बनेको सार्वजनिक खरिद नियमावलीसमेतको विपरीत रहेको तथ्यलाई अनदेखा गरी भ्रष्टाचार भएको ठहर अख्तियारले गरेको हो ।

नेपाल वायुसेवा निगमलाई गैरकानूनी हानी पुर्याउने बदनियतसाथ एमओयूमा कानूनविपरीतको प्राइस एस्केलेसनको सर्त र विमानको मेजर टेक्निकल स्पेसिफिकेसन (भारवहन क्षमता)लाई २४२ टनबाट २३० टन मा कायम गर्ने तर भुक्तानी भने २४२ टनकै गर्नेगरी प्रावधान राखिएको थियो । 

उक्त प्रावधानलाई बदर गराउन वा सच्याउन विभागीय मन्त्रीको हैसियतमा निर्देशन दिनुपर्नेमा शाहीले सोसमेत नगरेको-नगराएको अख्तियारको आरोप छ । उल्टै उनले प्रस्तावदाता र निगमका कर्मचारी, पदाधिकारीसँगको मिलेमतोमा नियमानुसारको बैंक जमानत, सुरक्षणबिना नै कमिटमेन्ट फी भुक्तानीका लागि डलर सटही सुविधाको सिफारिस गरेको पाइएको अख्तियारको ठहर छ । 

साथै कानून विपरीतको एमओयूलाई शाहीले वैधानिकता प्रदान गरेको अख्तियारको आरोप छ । ‘बैंक जमानत, सुरक्षणबिना नै कमिटमेन्ट फी भुक्तानी गर्नेगरी शाहीले गरेको निर्णयले उनको उत्तराधिकारीको रुपमा आउने कुनैपनि पदाधिकारी वा निकायले सो एमओयू बदर गर्दा नेपाल वायुसेवा निगमले कमिटमेन्ट फी पनि गुमाउनुपर्ने स्थिति बनेको थियो । र, विमान पनि प्राप्त नहुनेजस्ता दोहोरो जोखिममा पार्ने अवस्था उनले सिर्जना गरे÷गराएको पाइएको छ,’ अख्तियारले दायर गरेको अभियोगपत्रमा उल्लेख छ ।

शाहीले गरेको उक्त कार्यबाट प्राइस एस्केलेसनबापत आपूर्तिकर्तालाई भुक्तानी गरेको अमेरिकी डलर ६७ लाख ८८ हजार १०९ अर्थात  ७४ करोड ५८ लाख ७७ हजार ४८२ रुपैयाँ र २३० टन आपूर्ति गरेको तर आपूर्तिकर्तालाई २४२ टनकै मूल्य भुक्तानी गरेको आरोप छ । सोबापत अमेरिकी डलर ६६ लाख अर्थात ७२ करोड ५२ लाख ८ हजार रुपैयाँ गरी कुल १ अर्ब ४७ करोड १० लाख ८५ हजार ४८२ रुपैयाँ बढी भुक्तानी दिइएको अभियोगपत्रमा उल्लेख छ ।

साथै कर्णालीका पूर्वमुख्यमन्त्रीसमेत रहेका शाहीले राष्ट्रपतिबाट नियुक्ति लिई संघीय मन्त्री पदमा रही भ्रष्टाचार गरेको हुँदा उनीविरुद्ध थप सजायसमेत माग गरिएको छ ।

वाइडबडी विमान खरिदमा घोटालाः यी हुन् अख्तियारले मुद्दा दायर गरेका २४ नेपाली