गैरआवासीय नेपाली संघ (एनआरएनए) को दर्ता नवीकरण भएको छ । परराष्ट्र मन्त्रालयले दर्ता हुनुपर्ने मिति भन्दा ६ महिना ढिलागरी नवीकरणको निर्णय गरेको हो । 

हरेक १० वर्षमा हुनुपर्ने संस्था नवीकरण गत अक्टोबरमै हुनुपर्ने भएपनि उच्च अदालत पाटनको फैसलापछि मात्रै मन्त्रालयले नवीकरण गरिदिएको हो । यसअघि संघभित्रको विवादलगायतका कारण मन्त्रालयले नवीकरणमा आलटाल गर्दै आएको थियो । संस्था नवीकरण नभएकै कारण संघको  बद्री केसी पक्ष अदालत पुगेको थियो । 

हाल आएर गैरआवासीय नेपाली सम्बन्धी ऐनअनुसार संस्था नवीकरण भएको मन्त्रालयको नीति, योजना, विकास कूटनीति तथा विदेशमा रहेका नेपालीसम्बन्धी महाशाखाका शाखा अधिकृत जीत बहादुर कार्कीको हस्ताक्षरमा संघलाई प्रेषित गरिएको पत्रमा उल्लेख गरिएको छ ।