नेकपा (एकीकृत समाजवादी)का केन्द्रीय सदस्य सुदेश पराजुलीले अझै पनि राजनीतिमा अराजकतावाद र असहिष्णुको मुख्य भकारी ओली(केपी शर्मा ओली) प्रवृत्ति र ओली नै भएको टिप्पणी गरेका छन् । नेपाली राजनीतिमा झुट, छलछाम, गालीगलोज, आरोप-प्रत्यारोप, विधि पद्धतिको उल्लंघन, सहमतिमा धोकाधडीको शुरूवात एमाले अध्यक्ष ओलीबाट नै भएको उनले आरोप लगाएका छन् । एकीकृत समाजवादीले सुदूरपश्चिम प्रदेशमा केन्द्रीय समीकरणको सल्लाहविपरीत नेपाली कांग्रेसले समर्थन गरेका व्यक्तिलाई मुख्यमन्त्रीमा साथ दिएपछि ओलीले आक्रोश पोखेका थिए । एकीकृत समाजवादीको निर्णय अराजनीतिक भएको ओलीको टिप्पणी थियो । 

जवाफमा पराजुलीले अराजनीतिक एकीकृत समाजवादी नभई केपी ओली र ओली प्रवृत्ति भएको आरोप लगाएका हुन् । 'अराजनीतिक नेकपा एकीकृत समाजवादी होइन, कमरेड केपी ओली र ओली प्रवृत्ति हो । अझै पनि राजनीतिमा अराजकतावाद र असहिष्णुको मुख्य/ठूलो भकारी ओली प्रवृत्ति र ओली हुन्,’ उनले भनेका छन्, ‘नेपाली राजनीतिमा झुट, छलछाम, गालीगलोज, आरोप-प्रत्यारोप, विधि पद्धतिको उल्लंघन, सहमतिमा धोकाधडीको शुरूोात कमरेड ओलीबाट नै भएको छ ।’

एकीकृत समाजवादीले सुदूरपश्चिमको मुख्यमन्त्री पहिले आफूहरूले पाउने सहमति भएको दाबी गर्दै आएको छ । आफ्नो भागमा परेको मुख्यमन्त्री नागरिक उन्मुक्तिलाई दिन खोजिएपछि असन्तुष्ट एकीकृत समाजवादीले सुदूरपश्चिममा कांग्रेसले समर्थन गरेका लक्ष्मण किशोरलाई साथ दिएको हो ।