नेपाली कांग्रेसका महामन्त्री गगन थापाले विकास र सुशासन पार्टीको मुख्य ‘एजेन्डा’ हुनुपर्ने बताएका छन् ।

‘समुदायमा कांग्रेस संवाद कार्यक्रम’का क्रममा आज धनगढीमा आयोजित कार्यक्रममा महामन्त्री थापाले यस्तो बताएका हुन् ।

विकासका सवालमा दलहरूबीच राष्ट्रिय बहस गरी साझा धारणा बनाउनुपर्ने, भ्रष्टाचार निर्मूल गर्न र कानूनी शासनलगायतका मुद्दामा कांग्रेसले नेतृत्व गर्नुपर्ने उनको भनाइ थियो ।

पार्टीको एजेन्डा २०८४ का लागि नभई आज देखिएका यावत समस्याको समाधानका लागि हुनुपर्ने उनले बताए ।

'वर्ष २०८१ लाई पार्टी शुद्धीकरण र पुनःजागरणको वर्ष बनाउनुपर्छ, एकवर्ष कांग्रेसले सिंहदरबार, बालुवाटार नहेरी राष्ट्रका मुख्य–मुख्य समस्या समाधान खोज्न पहल गर्नुपर्ने बेला आएको छ', उनले भने ।

पार्टीको भविष्यको नीति योजना बनाउनका लागि संवाद यात्रामा आएका सुझावले टेवा पुर्‍याउने उनले बताए ।

पार्टी सञ्चालन प्रक्रिया त्रुटिपूर्ण हुँदा पार्टीमा गुट उपगुटको समस्या देखिएको भन्दै उनले गुटबन्दीविरुद्ध उपचार खोज्ने बेला आएको बताए ।