उपप्रधान तथा गृहमन्त्री रवि लामिछानेले आफ्ना हिजोका अभिव्यक्ति खोतल्न आवश्यक नरहेको बताएका छन् । विदेशी भीआईपीको भ्रमणका क्रममा नेपालमा बिदा दिएको विषयमा लामिछानेले आठ वर्षअगाडि गरेको टिप्पणी पुन: भाइरल भएपछि उनले हिजो गलत भनिएको कुरा आज पनि गलत नै रहेको उल्लेख गरेका छन् । लामिछानेले ८ वर्ष पहिले सरकारले दिएको बिदालाई व्यङ्ग्य गर्दै बाउको मुख हेर्ने दिनमा पनि दिन भनेका थिए ।

आज कतारका अमिर आउने दिनमा गृह मन्त्रालयले दिएको बिदालाई लिएर सामाजिक सञ्जालमा उनको पुरानो अभिव्यक्तिको स्क्रिन सर्ट राखेर आलोचना भइरहेको छ । 'जे कुरा हिजो गलत भनिएको थियो त्यो आज पनि गलत नै हो, हिजोका अभिव्यक्तिहरुको गोताखोरी गर्नै पर्दैन,' उनले लेखेका छन् 'तर तीन दशकका अभ्यासहरूलाई सच्याउन समय त लाग्छ। धेरै काम हुँदैछन्, थोरै धैर्य गरिदिनु भए पुग्छ।' 

आफूले भीआईपीको सवारीका बेलामा नागरिकले पाउने सास्ती, करोडौँ खर्च गरेर दिइने पदक, आम माफीका विषयमा आफूले लगातार काम गरिरहेकाले छिट्टै रिजल्ट आएने उनले बताएका छन् । 'विगतका कयौं निर्णय र परम्परा  छन् जसलाई नितिगत निर्णय गरी सच्याउनु पर्छ। अनावश्यक बिदा, भिआइपी सवारीका नामको नागरिकले पाउने सास्ती, करोडौं खर्च गरेर दिइने पदक सम्मान, आम माफीका नाममा  पहुँच वाला अपराधीलाई मात्र छुट, सुरक्षाकर्मीहरूलाई कामदार बनाउने परम्परा, केही भूतपूर्वहरूलाई दिइदै आएको अभूतपूर्व सुविधालगायत तमाम विषयमा  पदबाहल गरेको दिनदेखि नै लगातार काम गरिरहेको छु।  रिजल्ट आउँदैछ,' उनले लेखेका छन् ।  

तर विधि नै नफेरिकन कुनै व्यक्ति, देश वा घटना हेरेर फरक फरक निर्णय गरिनु कूटनैतिक, राजनैतिक र वैधानिक हिसाबले सही नहुने उनको भनाइ छ । 

विश्व अर्थराजनीतिमा नयाँ मानक स्थापित गर्दै हाम्रा लाखौं युवाहरूलाई रोजगारीको अवसर दिइरहेको र नेपालसँग ऐतिहासिक कूटनैतिक सम्बन्ध स्थापित भएको मित्र राष्ट्र कतारका अमिर शेख तमिम बिन हमाद अल थानीलाई नेपालमा ससम्मान स्वागत गर्ने उनले बताएका छन् ।

यस्तो छ उनको स्टाटस