इलाम २ को उपनिर्वाचनमा पहिचानवादी स्वतन्त्र उम्मेदवार डकेन्द्रसिंह थगिम लिम्बूले कांग्रेसका डम्बरबहादुर खड्कालाई टक्कर दिने गरी मत प्राप्त गरेका छन् । तर ठूला दललाई चुनौती दिने ठानिएको रास्वपा (घण्टी) इलाममा अहिलेसम्मको मतगणनामा भने कमजोर देखिएको हो ।

फाकफोकथुमका सबै ७ वटा र चुलाचुलीका ३ वटा वडाको मतगणना सकिंँदा एमालेका सुहाङ नेम्वाङ ७ हजार ६७७ मतका साथ पहिलो नम्बरमा छन् । २ हजार २८२ मतले कांग्रेसका डम्बर खड्का पछाडि रहेका छन् । 

खड्काको ५ हजार ३९५ मत आएको छ । तर उनलाई स्वतन्त्रका थेगिमले पछ्याएइरहेका छन् । थेगिमले ४ हजार ५८ मत ल्याएका हुन् । चुलाचुली मतगणनामा थेगिमले एमालेपछिको बढी मत प्राप्त गरेका हुन् । रास्वपाका मिलन लिम्बूले १ हजार १६२ मत मात्रै ल्याएका हुन् । चार पक्षीय प्रतिस्पर्धा हुने अनुमान गरिए पनि रास्वपा भने कमजोर देखिएको हो । इलाम नगरपालिका र केही बजारी क्षेत्रमा रास्वपाले अझै कमब्याक हुने दाबी गर्दै आएको छ । 

चुलाचुलीमा पनि रास्वपाले राम्रो मत पाउने आशा गरेको थियो । तर चुलाचुली ३ र ४ मा एमालेले ६४४, मुढा चुनाव चिन्ह भएका स्वतन्त्र उम्मेदवार थेगिमले  ५४५ र कांग्रेसले २८६ मत प्राप्त गर्दा रास्वपाले ६० मात्रै मत पाएको छ । 

शनिबार भएको उपनिर्वाचनअन्तर्गत इलाम २ मा ६९ हजार २८७ मत खसेको थियो । जसमा  १६ हजार १४३ मत गणना भइसकेको छ । यो भनेको साढे २३ भन्दा बढी प्रतिशत हो ।