उपप्रधान एवं गृहमन्त्री रवि लामिछानेले सहकारी ठगीमा आफूविरुद्ध कहि कतै मुद्दा नचलेकोले संसदीय छानबिन आवश्यक नभएको दाबी गरेका छन् ।​

फाँसीमा झुन्ड्याइएकोलाई समेत सफाइको मौका दिइने भए पनि आफूलाई बोल्न नदिइएको उनले गुनासो गरे ।

सभामुख देवराज घिमिरेले मंगलवार बोलाएको बैठकपछि पत्रकारहरूसँग कुरा गर्दै लामिछानेले कसैमाथि आरोप लाग्दैमा संसदीय छानबिन समिति बनाउन नमल्ने बताएका हुन् ।

‘मविरुद्ध मिडियामा निरन्तर समाचार आएपछि महान्यायाधिवक्ता कार्यालयमार्फत मैले बुझेको थिए, कतै मुद्दा छैन, बयानमा पोलिएको पनि छैन’ लामिछानेले भने, ‘दलका नेतालाई बुझाइएको ज्ञापनपत्रमा पनि मेरो नाम छैन भने कसरी छानबिन समिति बनाउने ?’

कुनै प्रतिवेदनमा भएका विवरणलाई मुद्दा चल्ने प्रमाणको रूपमा हेर्न नमिल्ने बताए । ‘आफ्नो अफर मान्यो भने माथिल्लो पदका लागि विभिन्न च्यानलबाट कुरा ल्याउने । नमानेपछि गृहमन्त्रीमाथि छानबिनको कुरा उठाउने ?’, लामिछानेले कांग्रेससँग प्रश्न गरे ।

सहकारी ठगीमा रविको संलग्नता रहेको भन्दै कांग्रेसले संसदीय छानबिनको कुरा उठाइरहेको छ । संसदीय छानबिन समिति नबने वैशाख २८ गते शुरु हुने संसद् अधिवेशनका बैठक अवरुद्ध गर्ने कांग्रेसले चेतावनी दिएको छ ।

कांग्रेसको अडानमा कारण सभामुखले बोलाएको बैठक सहमतिमा पुग्न सकेन ।