आम जनता पार्टी (आजपा) आन्दोलिन हुँदै आएको छ । आजपाले भन्सार पुरस्कारको विरुद्धका साथै समावेशी शिक्षक दरबन्दीको माग गर्दै एकसाथ दुई आन्दोलन गर्दै आएको हो। 

वैशाख २० देखि भन्सार पुरस्कारको प्रावधान हटाउनुपर्ने मागमा रहेको आजपाले चौथो चरणको आन्दोलन अन्तरगत भन्सार विभाग घेराउ गर्दै आएको छ । 
जसअनुसार वर्षाका बिच मङ्गलवार पनि त्रिपुरेश्वरस्थित विभाग घेराउ गरिएको अध्यक्ष प्रभु साहले बताए ।  भन्सार कानुनमा रहेको ४५ प्रतिशत पुरस्कारको प्रावधान विरुद्ध आजपाले आन्दोलन गरिरहेको भन्दै यो व्यवस्था खारेज हुनुपर्ने उनले माग गरे । आन्दोलन आम सम्पर्क समितिको अगुवाइमा हुँदै आएको छ । 

यस्तै तराई मधेसमा विद्यार्थीको अनुपातमा शिक्षक दरबन्दीको व्यवस्था गर्न पार्टीले आम विद्यार्थी मोर्चाको अगुवाइमा मधेसका जिल्लाहरूमा प्रदर्शनसहित दबाब दिँदै आएको छ । 

 सोहीअनुसार मङ्गलवार धनुषामा विद्यार्थी र अभिभावकहरुले सडकमा प्रदर्शनसहित ज्ञापन पत्र बुझाएका छन् । धनुषा जिल्लामा १ लाख ८३ हजार विद्यार्थी सङ्ख्या रहेकोमा त्यहाँ मौजुदा शिक्षक जम्मा २ हजार ५ सय मात्र रहेको आजपाको भनाइ छ । जबकि ५० विद्यार्थीको अनुपातमा शिक्षक दरबन्दी ३६७१ हुनुपर्ने भए पनि शिक्षक दरबन्दी ११५० अपुग छ । आजपाले रौतहटसहितका जिल्लामा पनि शिक्षक दरबन्दीको माग गर्दै दैनिक दबाबस्वरुप प्रदर्शन गर्दै आएको छ ।