कैलाश सिरोहियालाई पक्रन गृहमन्त्रीको निर्देशनमा कानूनको कपटपूर्ण प्रयोग भयो : सिटौला

नेपाली कांग्रेसका नेता कृष्णप्रसाद सिटौलाले गृहमन्त्री रवि लामिछानेले कानूनको कपटपूर्ण प्रयोग गरी कैलाश सिरोहियालाई पक्राउ गरेको बताएका छन् । 

गणेशमान सिंह तथा शहीद स्मृति शान्ति प्रतिष्ठानले सोमबार आयोजना गरेको कार्यक्रममा सिटौलाले सहकारीमा प्रश्न उठेका गृहमन्त्रीले कानूनको दुरुपयोग गरेको बताएका हुन् । 

‘संसदीय छानबिन समिति बनाएर नीतिगत रुपले तथ्यमा प्रवेश गराएर नीतिगत रुपले सम्बोधन गर्दा जे रिपोर्ट आउला, त्यो रिपोर्ट त उहाँले मान्नुपर्ने हो । काँग्रेस व्यक्तिगत रुपमा कुनै पूर्वाग्रह राखेर अघि बढ्दैन । तर आज दुःखका साथ भन्नुपर्छ, कैलाश सिरोहियालाई पक्राउ गर्न किन गृहमन्त्रीले आदेश दिनुभयो ? मैले नबुझेको कुरा यहाँ छ,’ सिटौलाले भने, ‘अत्यन्त दुराशय ढंगले जुन परिस्थितिमा पक्राउ गर्नुभयो । जुन तरिकाले पक्राउ गरेर जसरी हिरासतमा राखिएको छ र अनुसन्धान भइरहेको छ, त्यसको निष्कर्ष कानूनको कपटपूर्ण प्रयोग भयो भन्ने हो ।’

सहकारी ठगीमा गृहमन्त्रीमाथि आरोप लागेपछि संसद्‌मा प्रतिपक्षले छानबिनको माग गरेको उनले बताए ।

‘एउटा सामान्य कुरालाई लिएर संसद् अवरुद्ध भएको छ । म सामान्य कुरा भन्दछु । गृहमन्त्रीमाथि आरोप लाग्यो, सारा प्रेस जगतले लेख्यो । संसद्‌मा प्रतिपक्षले कुरा उठायो । संसदीय छानबिन समिति गठन गरौं है भनेर कुरा त राखेको हो प्रतिपक्षले बढी केही कुरा राखेको होइन । विगतमा पनि यस्तो हुने गरेकै हो । 

विगतमा पनि कुरा उठेपछि छानबिन समिति बन्ने गरेको भन्दै सिटौलाले गृहमन्त्रीले प्रभाव पार्न खोजेको बताए ।

‘विगतमा मन्त्रीहरूका बारेमा प्रश्न उठ्दा संसदीय छानबिन समिति बनेका छन् । हामीले त्यस्तै गरौंसम्म भनेको हो । रवीजी गृहमन्त्री नबनेर अर्कै मन्त्री बन्नुभएको भए यो कुरा पनि उठ्ने थिएन,’ पूर्व गृहमन्त्रीसमेत रहेका सिटौलाले भने, ‘प्रहरीले उहाँमाथि आफैं अनुसन्धान गर्थ्यो होला । तर सहकारीको रकम अपचलन र ठगीको विषयमा अनुसन्धान गर्ने निकाय प्रहरी हो । जुन गृहमन्त्रीकै मातहतमा हुन्छ । यसले प्रहरी स्वतः प्रभावित स्वतः हुन्छ ।’  

महान्यायाधिवक्ता, आईजीपीलेसमेत गृहमन्त्रीको कुनै दोष छैन भन्नुले झन् आशंका बढाएको सिटौलाको भनाइ छ । 

‘महान्यायाधिवक्ताले उहाँको दोष देखिँदैन भनेर पत्र दिइसक्नुभयो । आइजीपीले उहाँको कुनै दोष छैन भनिसक्नु भयो भनेपछि प्रहरी संगठन के गर्दै होला । महान्यायाधिवक्ता कार्यालयले के गर्दै होला ? बुझिसक्यौं नि त सबै कुरा,’ सिटौलाले भने, ‘प्रधानमन्त्रीले अदालतको प्रक्रियाबाट पक्राउ पुर्जी आयो छोडिहाल्छ नि भनेर हल्का जवाफ दिनुभयो । सरकारले प्रहरीलाई अदालतमा पत्र लिएर जाउ, पक्राउ पुर्जीको आदेश माग है नभनेको भए अदालतले आफैं गरेको हो त ?’

अदालतलाई दोष दिएर सरकार उम्किन नमिल्ने सिटौलाले बताए । 

‘अदालत आफैं एक्टिभ भएको हो त, अदालतले पक्राउ गर भनेर पुलिसलाई निर्देशन दिएको होइन नि । सरकार एक्टिभ भएको हो,’ सिटौलाले भने, ‘अदालतलाई दोष दिएर उम्किने ठाउँ सरकारको छैन ।’