२२ असार २०८३, सोमबार
पाकिस्तान आइसीसी टी-२० विश्वकपको सेमिफाइनल दौडबाट बाहिरिएको छ । शनिबार राति श्रीलंकामाथि ५ रनको रोमाञ्चक जितका बावजुद पनि टोली सेमिफाइनलमा स्थान सुरक्षित गर्न असफल भएको हो । राम्रो नेट रन रेटको आधारमा न्यूजिल्याण्डले ३ अंकसहित शीर्ष चारमा स्थान सुरक्षित गर्यो । सुपर ८ को समूह २ को अंक तालिकामा पाकिस्तान तेस्रो स्थानमा रह्यो ।
सुपर ८ को तीनवटै खेल जितेको इंग्ल्याण्ड समूहको शीर्ष स्थानमा छ ।
इङ्ल्यान्ड र न्युजिल्यान्ड समूह २ बाट सेमिफाइनलमा पुगेका छन् । इङ्ल्यान्डले सुपर ८ मा उत्कृष्ट प्रदर्शन गर्दै लगातार तीन जित दर्ता गर्दै अंक तालिकाको शीर्ष स्थानमा रहेको छ । अब उनीहरूले समूह १ बाट दोस्रो स्थानमा रहेको टोलीसँग सामना गर्नेछन्।
सुपर ८ मा लगातार दुई खेल जितेर दक्षिण अफ्रिकाले ४ अंकसहित सेमिफाइनलमा स्थान सुरक्षित गरिसकेको छ । अर्कोतर्फ, जिम्बाब्वे लगातार दुई हारपछि नकआउट दौडबाट बाहिरिएको छ । आज पहिलो खेल दक्षिण अफ्रिका र जिम्बाब्वेबीच प्रतिस्पर्धा हुनेछ । जितले दक्षिण अफ्रिकालाई समूह १ को शीर्ष स्थानमा राख्नेछ। जिम्बाब्वेले जितेमा दक्षिण अफ्रिका दोस्रो स्थानमा झर्नेछ ।
न्युजिल्यान्ड तीन अंकसहित दोस्रो स्थानमा रह्यो । टोलीले सुपर ८ मा एक खेल जित्यो, वर्षाका कारण एक खेल रद्द भएको थियो ।
न्युजिल्यान्डको नेट रन रेट १.३९० थियो । पाकिस्तानको पनि तीन खेलपछि तीन अंक छ । टोलीले आफ्नो अन्तिम सुपर ८ मा श्रीलंकालाई ५ रनले पराजित गरेको हो, तर उनीहरूको नेट रन रेट -०.१२३ छ। यसै कारणले गर्दा, राम्रो रन रेटको आधारमा न्युजिल्याण्ड सेमिफाइनलमा छनोट भएको हो । न्युजिल्याण्डले अब मार्च ४ मा कोलकातामा समूह १ को शीर्ष टोली दक्षिण अफ्रिकासँग खेल्नेछ ।
भारत र वेस्ट इन्डिजबीचको अन्तिम सुपर ८ खेल आइतबार साँझ ७ बजे हुने तय भएको छ, जसले चौथो टोलीको निर्धारण गर्नेछ । उनीहरूबीचको खेल नकआउट सरह हुनेछ । विजेता टोली सेमिफाइनलमा पुग्नेछ भने हार्ने टोली बाहिरिनेछ । कोलकातामा दुई टोली चार पटक आमनेसामने भएका छन् र भारतले ती सबैमा जित हासिल गरेको छ।
भारत र वेस्ट इन्डिजले अहिलेसम्म ३० वटा टी-२० अन्तर्राष्ट्रिय खेल खेलेका छन्। यसमा भारतको अग्रता छ। भारतले १९ खेल जितेको छ भने वेस्ट इन्डिजले १० खेल जितेको छ । एउटा खेल नतिजाविहीन भएको छ।
यद्यपि, वेस्ट इन्डिजको टी-२० विश्वकपमा राम्रो रेकर्ड छ । विश्वकपमा दुई टोली चार पटक भेटेका छन्, जसमध्ये वेस्ट इन्डिजले तीन खेल जितेको छ र भारतले एउटा मात्र । अन्तिम पटक उनीहरूले एकअर्कासँग २०१६ को विश्वकप सेमिफाइनलमा भेटेका थिए, जब वेस्ट इन्डिजले भारतलाई सात विकेटले पराजित गरेको थियो ।
