काठमाडौं, २८ चैत– नेपाल प्रहरीका वर्तमान महानिरीक्षक प्रकाश अर्यालले बुधवारबाट अवकाश पाएका छन् । ३० वर्ष अगाडि २०४४ चैत २९ गते प्रहरी निरीक्षक (इन्सिपेक्टर)का रुपमा प्रहरी सेवामा प्रवेश गरेका अर्याल गत वर्ष (२०७३) चैत २८ गते नेपाल प्रहरीको महानिरीक्षक (आईजी)मा नियुक्त (बढुवा) भएका थिए । 

प्रहरी नियमावलीअनुसार ३० वर्षे सेवा अवधि पूरा गरेर अर्यालले अनिवार्य अवकाश पाएका हुन् । 

महानिरीक्षक अर्यालसँगै १५ जना अतिरिक्त प्रहरी महानिरीक्षक (एआईजी), ९ जना प्रहरी नायब महानिरीक्षक (डिआईजी) र एक जना प्रहरी वरिष्ठ उपरीक्षक (एसएसपी) पनि बुधवारबाट अनिवार्य अवकाश पाएका छन् । 

एआईजीहरु जयबहादुर चन्द, बमबहादुर भण्डारी, देवेन्द्र सुवेदी, बिजयकुमार भट्ट, हेमन्त पाल, रणबहादुर चन्द, मिङ्मार लामा, मधुप्रसाद पुडासैनी, केशरीराज घिमिरे, विजयलाल कायस्थ, माधवप्रसाद नेपाल, माधव जोशी, कमलसिंह बम, पंकज श्रेष्ठ र पशुपति उपाध्यायले अनिवार्य अवकाश पाएका हुन् । 

त्यस्तै डिआईजीहरुमा गणेश केसी,  केदारमानसिंह भण्डारी, रमेश रञ्जित, सुदीप आचार्य, रामेन्द्र सिंह देउजा, गोविन्द निरौला, भोगबहादुर थापा, पुष्प रञ्जित र पुष्कल रेग्मीले अवकाश पाएका छन् । अवकाश पाउने प्रहरी बरिष्ठ उपरीक्षक (एसएसपी)मा विष्णुहरि गौतम छन् । 

अर्यालको सहज बिदाइ

गत वर्ष फागुन २ गते तत्कालीन प्रहरी महानिरीक्षक उपेन्द्र कान्त अर्यालले अनिवार्य अवकाश पाउँदा नयाँ महानिरीक्षक को हुने भन्ने नै टुंगो लागेको थिएन । अघिल्लो दिन (फागुन १ गते) बसेको मन्त्रिपरिषद बैठकले जयबहादुर चन्दलाई आईजी बनाउने निर्णय गरे पनि सर्वोच्च अदालतले अन्तरिम आदेश जारी गर्दै चन्दलाई आईजी हुनबाट राकेको थियो । 

आईजी बनाइ पाउँ भन्दै नवराज सिलवाल अदालत पुगे । अदालतले बरियताका आधारमा एक नम्बरमा रहेका व्यक्तिलाई आईजी बनाउन आदेश जारी गरेपछि पहिलो नम्बरमा रहेका प्रकाश अर्याल आईजी बन्न पुगे ।

विभिन्न विवाद झेल्दै आईजी बन्न पुगेका अर्यालको कार्यकालमा देशमा तीन तहको निर्वाचन सम्पन्न भएको छ । साथै संविधान कार्यान्वयनको चरण पूरा भएर देश नयाँ दिशामा अगाडि बढेको छ । 

प्रकाश अर्याल प्रहरी सेवाबाट बिदाइ भएर घर फर्किँदा बुधवार साँझको ८ बजिसकेकाे थियो । आफ्नै बिदाइ समारोहमा उपस्थित अर्याल गेम जिताएर फर्किएको टिमका क्याप्टेन जस्तो आत्मविश्वासी देखिन्थे । सायद उनी आफूले सफलतापूवर्क जिम्मेवारी पूरा गरेको ठानिरहेका थिए ।   

अर्यालयको बिदाइ कार्यक्रममा सहभागी प्रहरी अधिकारीहरु उनको सहज बिदाइ भएको बताइरहेका थिए । 

‘जस्तोसुकै विवाद झेलेर आएपनि उहाँले प्रहरी संगठनलाई सन्तुलित रुपमा अगाडि बढाउने प्रयास गर्नुभयो,’ अर्यालको बिदाइ समारोहमा भेटिएका एक प्रहरी अधिकारीले भने, ‘उहाँ पनि आफ्नो सेवाअवधि र आफूले निर्वाह गरेको जिम्मेवारबाट सन्तुष्ट हुनुहुन्छ होला ।’