काठमाडौं, ५ असार -प्रदेश नम्बर ३ की प्रदेश प्रमुख अनुराधा कोइरालाले स्वर्गीय डा. उपेन्द्र देवकोटाबाट सबैले अनुशासन सिक्नुपर्ने बताएकी छन् ।

डा. देवकोटाप्रति अन्तिम श्रद्धाञ्जली व्यक्त गर्न न्युरो अस्पताल बाँसबारी पुगेकी कोइरालाले आँसु झार्दै देवकोटालाई स्मरण गरिन् ।

पूर्वराजा ज्ञानेन्द्रको प्रत्यक्ष शासनकालमा डा. देवकोटा स्वास्थ्यमन्त्री बन्दा कोइराला महिला, बालबालिका मन्त्री बनेकी थिइन् । 

त्यतिबेला सँगै काम गरेको स्मरण गर्दै कोइरालाले भनिन् - 'मैले उहाँसँगै काम गर्दा उहाँ एकदमै बोल्ड निर्णय गर्नसक्ने र अनुशासित व्यक्तित्व हुनुहुन्थ्यो ।'

डा. देवकोटाबाटै सबैले अनुशासित हुन सिक्नुपर्ने उनको भनाइ छ ।