समाचार प्रभाव : शिवरात्रिकै दिन दलितलाई पूजा गर्न रोक लगाउने ‘माता’ प्रहरी खोरमा

धनगढी- मन्दिरमा पूजा गर्न गएका दलित समुदायलाई पूजा गर्नबाट रोक लगाउने मन्दिरकी पूजारी (माता) अन्दाजी ४० वर्षीया गंगा गिरी पक्राउ परेकी छन् ।

जातीय विभेद गरी दलितलाई पूजा गर्न रोक लगाइएपछि लोकान्तरले घटनाबारे बुझ्ने क्रममा जिल्ला प्रहरी कार्यालय कैलालीका प्रहरी उपरीक्षक आभुषण तिमिल्सिनालाई अवगत गराएको थियो ।

समाचार प्रकाशन भएको आधा घण्टामै डोटी जिल्लाको सिलगढी घर बताउने पूजारी गिरी पक्राउ परेकी हुन् ।

वडा प्रहरी कार्यालय धनगढीका प्रहरी निरिक्षक वकिल सिंहको नेतृत्वको प्रहरी टोलीले उनलाई पक्राउ गरेको हो । प्रहरी निरीक्षकले सिंहले उनलाई पक्राउ गरिसकेको बताउँदै घटनाबारे थप अनुसन्धानसमेत शुरू गरेको जानकारी दिए ।