नुवाकाेट– नुवाकोटको तारकेश्वर गाउँपालिका- २ स्थित श्रीकृष्ण क्याम्पस सञ्चालनका लागि आर्थिक संकट आइपरेको छ । 

२०७० सालदेखि सञ्चालित सो क्याम्पसबाट स्थानीयले गाउँमै उच्च शिक्षा अध्यययन गर्ने अवसर पाए पनि अहिले चरम आर्थिक संकट झेल्न बाध्य रहेको तारकेश्वर गाउँपालिका वडा नम्बर २ का वडाध्यक्ष समरबहादुर आलेले जानकारी दिए । 

आर्थिक संकटबाट छुटकारा पाउनकै लागि अहिले क्याम्पसले विभिन्न उपाय खोजिरहेको र यसै क्रममा क्याम्पस परिसरमै श्रीमद्भागवत सप्ताह वृहद् धार्मिक शैक्षिक महोत्सव गर्न लागिएको महोत्सव आयोजक समितिका अध्यक्ष समेत रहेका आलेले जानकारी दिए । 

उनका अनुसार धार्मिक शैक्षिक महोत्सव शनिबारदेखि चैत ३० गतेसम्म सञ्चालन हुनेछ । 

त्यसको लागि सम्पूर्ण तयारी भइसकेको बताउँदै क्याम्पस प्रमुख भरत सिग्देलले शनिबार (चैत २३ गते ) बिहान कलस यात्रा गरेर दिउँसो १ बजे धार्मिक शैक्षिक महोत्सवको विधिवत उद्घाटन गर्ने कार्यक्रम रहेको जानकारी दिए ।  

प्रचारप्रसार उपसमितिका संयोजक राजेन्द्र न्यौपानेले महायज्ञ तथा धार्मिक शैक्षिक महोत्सवबाट एक करोड बढी रकम उठाउने लक्ष्य लिएको भन्दै त्यसका लागि महायज्ञ अघि नै केही रकमको प्रतिबद्धता पनि आएको बताए । 

महायज्ञबाट उठ्ने रकमले क्याम्पसको निम्ति जग्गा खरिद र भवन निर्माणका साथै कर्मचारी व्यवस्थापनमा खर्च गरिने अध्यक्ष आलेले जानकारी दिए ।

यस्तै श्रीकृष्ण माविमा सूचना प्रविधि कक्षा सञ्चालन गर्ने पनिआयोजकको लक्ष्य रहेको छ।  

महायज्ञमा बालतपस्वी पण्डित उत्तम भट्टले कथा बाचन गर्नेछन् । 

महायज्ञमा हरेक दिन संकेतमय श्रीमदभागवत कथा पितृमुक्ति, शालिग्राम पूजन अर्चना, ब्रतबन्ध तथा तुलसी दानका साथै रुद्री, चौरासी पूजा र जन्मोत्सव पूजा कार्यक्रम समेत गरिने छ । 

आयोजकले महायज्ञ सभ्य र भव्य रूपमा सम्पन्न गर्नका लागि आवश्यक पर्ने सबै तयारी पूरा भएको भन्दै सहयोग गर्न चाहनेहरुका लागि श्रीकृष्ण क्याम्पस र मावि सप्ताह ज्ञान महायज्ञको नाममा रहेकाे हिमालयन बैंककाे खाता नम्बर ०५८०८०७८२०००१७  नम्बर उपलब्ध गराएको छ ।