सामाजिक सुरक्षा कोषको कार्यकारी निर्देशकको पदपूर्ति खुला प्रतिस्पर्धाबाट

काठमाडौँ– सरकारले खुल्ला प्रतिस्पर्धाबाट सामाजिक सुरक्षा कोषको कार्यकारी निर्देशकको पदपूर्ति गर्ने भएको छ । 

    कार्यकारी निर्देशकको नियुक्तिका लागि कोषले आज एक सूचना जारी गर्दै सामाजिक सुरक्षा कोषको कार्यकारी निर्देशकको छनोट, पारिश्रमिक, सुविधा तथा सेवा सर्तसम्बन्धी विनियमावली, २०७६ बमोजिमको शैक्षिक योग्यता र अनुभव भएका व्यक्तिले २१ दिनभित्र दरखास्त दिन सक्ने जनाएको छ । 

    सम्पूर्ण नागरिकलाई सामाजिक सुरक्षाको दायरामा ल्याउने गरी सरकारले घोषणा गरेको योगदानमा आधारित सामाजिक सुरक्षा योजना कार्यान्वयन गर्ने जिम्मेवारी कोषसँग रहेको छ । कोषको काम कारवाहीलाई प्रभावकारी ढङ्गबाट कार्यसम्पादन गर्नका लागि खुल्ला प्रतिस्पर्धाबाट योग्य कार्यकारी निर्देशक छनोट गर्न लागिएको श्रम, रोजगार तथा सामाजिक सुरक्षा मन्त्रालयले जनाएको छ ।

    कार्यकारी निर्देशकका लागि दरखास्त दिने व्यक्तिले कोषको उत्पादकत्व तथा प्रतिस्पर्धात्मक क्षमता अभिवृद्धि, मानव संसाधन व्यवस्थापन, वित्तीय व्यवस्थापन, आन्तरिक नियन्त्रण प्रणाली, संस्थागत सुदृढीकरण र क्षमता विस्तार, सूचना प्रविधिको उपयोग, कार्यक्षेत्र विस्तार, योगदानकर्तामैत्री सेवा प्रवाह, लगानी व्यवस्थापन, वित्तीय जोखिम व्यवस्थापन जस्ता विषय सम्बोधन गर्ने कार्ययोजना पेश गर्नुपर्ने कोषले जनाएको छ ।