करको दायरामा आए ३० हजार करदाता

प्रतिकात्मक तस्वीर

तनहुँ – आन्तरिक राजस्व कार्यालयमा ४ जिल्लाका करीब ३० हजार करदाता करको दायरामा आएका छन् ।

तनहुँको सदरमुकाम दमौली कार्यालय रहेको उक्त कार्यालयमा तनहुँसहित गोरखा, लमजुङ, मनाङ गरी ४ जिल्लाका व्यवसायी करको दायरामा आएका हुन् ।


Advertisement

व्यवसायीलाई करको दायरामा ल्याउन कार्यक्षेत्र रहेका ४ वटै जिल्लाका विभिन्न स्थानमा गएर करसम्बन्धी सचेतना कार्यक्रम गर्दै आएको कार्यालयका प्रमुख कर अधिकृत सूर्यप्रसाद सेढाईंले जानकारी दिए ।

कार्यालयले दर्ता अनुगमन गर्ने, दर्ता भएर कर नतिरी बसेका करदातालाई कर तिर्न आग्रह गर्ने, करदातालाई कर तिर्ने वातावरण सिर्जना गर्ने लगायतको कार्यहरु गर्दै आएको उनले बताए ।

कार्यालयले आव ०७५/७६ मा लक्ष्यभन्दा १ अर्ब ५ करोड ६१ लाख बढी राजस्व संकलन गरेको जनाएको छ । कार्यालयले आव ०७४/७५ मा ४८ करोड २४ लाख ५७ हजार रुपैयाँ राजस्व संकलन गरेको थियो भने आव ०७५/७६ मा ५ अर्ब ३० करोड ८ लाख ५० हजार रुपैयाँ राजस्व संकलन गर्न सफल भएको प्रमुख कर अधिकृत सेढाईंले बताए ।

उनका अनुसार ५ अर्ब १९ करोड ५२ लाख राजस्व संकलन गर्ने कार्यालयको लक्ष्य रहेपनि लक्ष्यभन्दा बढी राजस्व संकलन भएको छ । ‘यसरी बढी राजस्व संकलन गर्नेमा मालपोत कार्यालय, जिल्ला प्रशासन कार्यालय र जिल्ला ट्राफिक कार्यालयहरू रहेका छन्,’ उनले भने । करदाता सेवा कार्यालयका रूपमा रहेर सेवा प्रवाह गर्दै आएको कार्यालयलाई विक्रम संवत् २०७५ असार २० गतेदेखि आन्तरिक राजस्व कार्यालयमा स्तरोन्नति गरिएको थियो । 

कमेन्ट गर्नुहोस्