धनगढी-उपनिर्वाचन अन्तर्गत सुदूरपश्चिमको ५ जिल्लामा शान्तिपूर्ण वातावरणमा शनिवार बिहानैदेखि शुरू भएको मतदान जारी रहेको छ ।

सुदूरपश्चिमको १२ मतदान स्थलका १५ मतदान केन्द्रमा बिहान ७ बजेदेखि मतदान शुरू भएको हो ।

जिल्ला निर्वाचन कार्यालयहरूका अनुसार सुदूरपश्चिमको बाजुराको त्रिवेणी नगरपालिका–१, अछामको मेल्लेख गाउँपालिका–४, डोटीको आदर्श गाउँपालिका–२, बैतडीको पुर्चौडी नगरपालिका–४, सुर्नया गाउँपालिका–१ र दोगडाकेदार गाउँपालिका–४ र कञ्चनपुरको पुनर्वास नगरपालिका ३ मा निर्वाचन जारी छ ।

जिल्ला निर्वाचन कार्यालय बैतडीका निर्वाचन अधिकारी माधव फुयालले निर्धारित सममै शान्तिपूर्ण वातावरणमा उत्साहपूर्ण ढंगले शुरू भएको मतदान जारी रहेको जानकारी दिए ।

हालसम्म करीब ६० प्रतिशत मत खसेको उनले जानकारी दिए । पुनर्वास नगरपालिका ३ को मतदान अधिकृत अजय मनान्धरले करिब ५० प्रतिशत मत खसेको जानकारी दिए । त्यस्तै, अछामको जिल्ला निर्वाचन अधिकृत गजेन्द्र प्रकाश थारुका अनुसार मेल्लेख गापा–४ मा जारी मतदानमा बिहान ११ बजेसम्ममा करिब ४५ प्रतिशत मत खसेको छ ।