नेपाल कम्युनिस्ट पार्टी (नेकपा) अध्यक्ष पुष्पकमल दाहाल ‘प्रचण्ड’ले नेपाल–भारत सीमा विवादको निकासको लागि कूटनीतिक पहल जारी रहेको स्पष्ट पारेका छन् ।

विहीवार धनगढीमा प्रेस संगठन नेपालले आयोजना गरेको पत्रकार सम्मेलनमा उनले निकासको लागि कूटनीतिक र राजनीतिक तवरले पहल जारी रहेको स्पष्ट पारेका हुन् ।

विषयको गाम्भीर्यतालाई विचार गरेर नै सरकारले सर्वदलीय र सर्वपक्षीय बैठक बोलाएर सर्वसम्मत ढंगले कालापानी, लिपुलेक र लिम्पियाधुराबारे धारणा स्पष्ट गरेको बताउँदै अध्यक्ष प्रचण्डले भने, ‘राष्ट्रिय सहमति बनेको छ ।लिम्पियाधुरा नै महाकालीको मुहान हो र महाकाली सीमा नदी हो । यसमा कुनै कन्फ्युजन छैन । सरकारले अब राजनीतिक र कूटनीतिक ढंगले तुरुन्तै पहल गरेर त्यो क्षेत्र फिर्ता ल्याउन प्रक्रिया अगाडि बढाउनुपर्छ भन्ने सुझाव त्यो सर्वपक्षीय छलफलले दिएको थियो । त्यो अनुसार सरकारले परराष्ट्र मन्त्रालयमार्फत भारतलाई पत्र पठाएको छ । त्यसको उत्तर आइसकेको छैन ।’

उनले सीमा मुद्दालाई अन्तर्राष्ट्रियकरण गर्ने बेला नआएको पनि स्पष्ट पारेका छन् । पत्रकार जिज्ञासामा उनले अगाडि थपे, ‘मैले अन्तर्राष्ट्रियकरण गर्र्नु पर्दैन भन्ने भाषामा भनेको होइन । हामीले पहिला राजनीतिक र कूटनीतिक पहल गरेर संवादबाट समाधान गर्न कोसिस गर्नुपर्छ । शुरूमा नै अन्तर्राष्ट्रियकरण गर्ने भनेर भन्यो भने यो समस्या झन् जटिल हुन्छ । त्यो चरण अहिले होइन ।’

नेता प्रचण्डले भारतीय पक्षमाथि कडा टिप्पणी गरेका छन् । केही दिनअघि नेपालका लागि भारतीय पूर्व राजदूत श्याम शरणले कालापानी मुद्दालाई लिएर ‘नेपालका राजनीतिक दलले राजनीतिकरण गरे नेपालको लागि राम्रो हुँदैन’ भन्ने धारणालाई लक्षित गर्दै प्रचण्डले कडा टिप्पणी गरेका हुन् ।

‘पहिलो कुरा उहाँले कसरी भन्नुभयो भन्ने एउटा आर्टिकल पनि आयो भन्ने मैले सुनेको छु । उहाँले ८० लाख नेपालीको कुुरा पनि गर्नु भएछ । यसलाई राजनीतिकरण गरियो भनेर मैले पनि सुने । यो कुरा बिल्कुलै जायज छैन,’ अध्यक्ष प्रचण्डले भने, ‘श्यामशरण जस्तो कूटनीतिक रुपले परिपक्व मानिन्थ्यो । उहाँले यो किसिमको भाषा प्रयोग गर्नु कहीँकतै शोभनीय छैन । हामीले कुनै राजनीतिकरण गर्न खोजेका छैनौं । नेपालको भूमि नेपालको हो, भनेका छौं । संवाद र राजनीतिक पहलमार्फत हल गर्ने कुरा गरेका छौं । यसलाई राजनीतिकरण भएको श्यामशरणजीले देख्नुभएको छ भने उहाँको दृष्टिदोष हो । नेपाल राष्ट्र एक छ ।’

सुदूरपश्चिम प्रदेश सरकारको अयोजनामा शुक्रवार धनगढीमा हुने वित्तीय सम्मेलनको उद्घाटन गर्न आएका नेकपा अध्यक्ष प्रचण्डले सबैतिर विकासको गति धमाधम बढेको दाबी गरे ।

संघीय लोकतान्त्रिक गणतन्त्र घोषणा भइसकेपछि निर्वाचन समेत भएर जननिर्वाचित सरकार आइसकेपछि अबको ध्यान आर्थिक विकास र समृद्धिमा केन्द्रित भएको बताए । सरकारप्रतिको जनअपेक्षा पनि बढेको उनले बताए ।