अमेरिकाको इतिहासमा तेस्रोपटक बहालवाला राष्ट्रपति विरुद्ध महाअभियोग लागेको छ र मंगलवारदेखि त्यसको पुर्पक्ष हुँदैछ । 

सिद्धान्ततः यस पुर्पक्षले राष्ट्रपति डोनल्ड ट्रम्पलाई पदमुक्त गराउन सक्छ । उनी पदमुक्त भए भने त्यो निकै आश्चर्यजनक हुनेछ । 

ट्रम्पलाई दुईवटा विषयमा महाअभियोग लगाइँदैछ । 

पहिलो, उनले दोस्रो कार्यकालका लागि चुनाव जित्न युक्रेन सरकारको सहयोग लिएको आरोप छ । उनले युक्रेनलाई दिइने लाखौं डलर सहायता रकम रोकेको र युक्रेनी राष्ट्रपतिसँग ह्वाइट हाउसमा हुने भनिएको बैठक लट्काएर राखेको आरोप छ ।

सहायता रकम निकासा गर्नका लागि उनले युक्रेनलाई डेमोक्रेटिक पार्टीका नेता जो बाइडनविरुद्ध अनुसन्धान गराउने शर्त राखेको प्रत्यक्षदर्शीहरूले बताएका छन् । 

दोस्रो, ह्वाइट हाउसले पोहोर साल पहिलो महाअभियोग सुनुवाइमा आफ्ना कर्मचारीलाई बयान दिन अनुमति नदिएको आरोप छ । विपक्षी डेमोक्रेटहरूले ट्रम्पविरुद्ध कांग्रेसको काममा अवरोध गरेको आरोप लगाएका छन् । 

ट्रम्पले कुनै गल्ती नगरेको दाबी गर्दै आएका छन् र उनको कानूनी सल्लाहकार टोलीले प्रमाणविहीन आरोप लगाउनु संविधानको खतरनाक उल्लंघन भएको बताएका छन् ।

अहिलेको महाअभियोग प्रस्तावको सम्बन्ध यसअघि भएको स्पेसल काउन्सेलले गरेको अनुसन्धानसँग छैन । त्यस अनुसन्धानमा ट्रम्पको चुनावी अभियानको सम्बन्ध रुससँग रहेको कुरालाई हेरिएको थियो । तर त्यस अनुसन्धानले ट्रम्पविरुद्ध कुनै कारवाहीको सिफारिश गरेन । 

सिनेटमा चल्ने महाअभियोग छलफलमा सिनेटरहरूले हाउस अफ रिप्रेजेन्टेटिभ्सका अभियोजनकर्ता र ह्वाइट हाउसका वकिलहरूका साथसाथै प्रत्यक्षदर्शीहरूको तर्क सुन्नेछन् । त्यसपछि सिनेटरहरूलाई विचार गर्न पूरा एक दिन दिइनेछ । अनि उनीहरूले ट्रम्पविरुद्ध महाअभियोग लगाउने कि नलगाउने भन्ने विषयमा मतदान गर्नेछन् । 

सिनेटमा १०० सीट छन् र महाअभियोग पारित गर्न ६७ मत आवश्यक हुन्छन् । तर विपक्षी डेमोक्रेट जम्मा ४७ छन् भने ५३ जना रिपब्लिकन छन् । त्यसैले ट्रम्पविरुद्ध महाअभियोग पारित हुने सम्भावना खासै देखिँदैन ।

कथंकदाचित् ट्रम्प दोषी ठहर भएछन् भने उनलाई पदच्युत गरिनेछ र उपराष्ट्रपति माइक पेन्सलाई राष्ट्रपति बनाइनेछ । 

सिनेटको सामान्य बहुमत अर्थात् ५१ भोट मात्रले पनि यो पुर्पक्षलाई अन्त्य गराउन सक्छ ।

बीबीसीबाट