नवलपरासी–नेपाली कांग्रेसका महामन्त्री गगनकुमार थापाले पार्टीभित्र खुसी र सन्तुष्टि ल्याउन आवश्यक रहेको बताएका छन् । बिहीवार पश्चिम नवलपरासीबाट शुरू भएको दोस्रो चरणको संवाद यात्रामा उनले ‘कांग्रेसले आफ्ना सबै कार्यकर्तामा खुसी ल्याउनुपर्छ’ भनेका हुन् । 

उनले कांग्रेस पार्टीमा आठ लाख क्रियाशील सदस्य रहेको र नेपालको ठूलो पार्टी भएकाले ती सबै सदस्यमा खुसी र सङ्गठनप्रति उनीहरूमा क्रियाशीलता ल्याउनुपर्ने आवश्यकता आफूले देखेको धारणा राखे । 

‘यी सबै सदस्य खुसी भए भने देशका सबै मानिसलाई खुसी बनाउँछन् र यी सबै सदस्य आफैँमा थकित र निराश भए भने पार्टीमा त आउँदैन र देशमा पनि खुसियाली आउँदैन,’ उनको भनाइ थियो, ‘त्यसैले सबैभन्दा पहिला पार्टीले आफूभित्रै खुसी, सन्तुष्टि र विश्वास ल्याउन आवश्यक छ ।’ 

पार्टीभित्रको लडाइँको अन्त्य गर्न सबै मिलेर जान आवश्यक रहेको पनि महामन्त्री थापाले बताए । जिल्लाहरूमा जाँदा विविध खालका समस्या देखिएकाले तिनको निकास पनि जिल्लाबाटै निकाल्नुपर्ने उनको भनाइ थियो ।

उनले आउने संसदीय निर्वाचनमा कांग्रेस कसैसँग गठबन्धन नगरी एकलै लड्ने पनि जानकारी दिए । उनले बिहीवार नवलपरासीस्थित गुठ्ठी सूर्यपुरामा रहेको बीपी कोइरालाको सालिकमा माल्यार्पण गरेर दोस्रो चरणको संवाद यात्राको शुरूवात गरेका थिए । –रासस