दार्चुलाका एक युवा कर्मभूमि सप्तरीका जनताको सेवामा जुटेका छन् । आँखा स्वास्थ्य कार्यकर्ता अनिल साउदले सप्तरी, रुपनगरका जनताको नि:शुल्क स्वास्थ्य परीक्षण गरेर नयाँ वर्ष २०८१ को आरम्भ गरेका हुन् ।

तिलगंगा आँखा प्रतिष्ठानद्वारा सञ्चालित 'तिलगंगा कञ्चनरुप सर्जिकल आँखा केन्द्र', रुपनगरका आँखा स्वास्थ्य कार्यकर्ता अनिलले 'राष्ट्रका लागि दुई घण्टा योगदान' भन्ने मूल भावका साथ रुपनगर चोकमा रक्तचाप, मधुमेह जाँच, दृष्टि परीक्षण, बीएमआईलगायत स्वास्थ्य अवस्थाबारे नि:शुल्क परामर्श दिने अभियान शुरू गरेका हुन् ।​

'राष्ट्रका लागि दुई घण्टा योगदान' कार्यक्रमको उद्घाटन गर्दै रुपनगर क्याम्पसका प्रमुख प्राध्यापक दीपककुमार गजुरेलले नागरिकको सेवा आफैंबाट शुरू गर्नुपर्ने बताए ।

एक जनाको रक्तचाप परीक्षण गरेर कार्यक्रमको शुभारम्भ गर्दै प्राध्यापक गजुरेलले भने, 'दुर्गम दार्चुलाबाट आएको केही दिनमै तराईको समाज, हावापानी र परिस्थिति सँग घोलिएर रमाउने युवा अनिलप्रति हामी सप्तरीवासी आभारी छौं ।'​

अनिलको समाज सेवामा हामी पनि हरेक तवरले सहयोगी बन्न सक्नुपर्ने उनले बताए ।

प्राध्यापक गजुरेलले तीन हजार रुपैयाँ सहयोग हस्तान्तरण गर्दै आगामी दिनमा पनि सकेको मद्दत गर्ने प्रतिबद्धता जनाए ।

मधेश प्रदेशका गृह मन्त्री राजकुमार लेखीले रक्तचाप र आँखा जाँच गराएर अनिल साउदको सेवा भावको प्रशंसा गरे । उक्त अवसरमा कञ्चनरुप नगरपालिकाका पहिलो नगर प्रमुख वसन्त मिश्रले पनि स्वास्थ्य परीक्षण गराएका थिए ।