काठमाडौं – प्रतिबन्धित नेत्रविक्रम चन्द ‘विप्लव’ समूहको सक्रियता बढेको भन्दै सुरक्षा निकायबाट ४० जनालाई खटाइएको छ ।

महाकुलुङ गाउँपालिका–३ छेस्कामस्थित प्रहरी चौकीमा आइतवार राति विप्लव समूहले आक्रमण प्रयास गरेको समाचारसँगै सुरक्षा निकाय सक्रिय भएका छन् ।

प्रभावित क्षेत्रमा काठमाडौंबाट सशस्त्र प्रहरी नायव निरीक्षकसहित ११ जना, विराटनगरबाट सशस्त्र प्रहरी निरीक्षकसहित १६ जना र सोलुखम्बुबाट सशस्त्र प्रहरी सहायक निरीक्षकसहित १३ जना परिचालन गरिएका छन् ।

प्रभावित क्षेत्रमा नेपाल प्रहरीको टोली समेत परिचालन भएको छ । जिल्ला प्रहरी कार्यालय सोलुखुम्बुका प्रवक्ता तथा प्रहरी निरीक्षक प्रदीप सुवेदीले गाउँपालिकामा सुरक्षा सक्रियता बढाइएको बताए । उनका अनुसार छेस्काममा असईको नेतृत्वमा १२–१५ जना रहेको प्रहरी चौकी छ । 

गाउँपालिका अध्यक्ष सागर किरातीले विप्लवका गतिविधिसँगै सुरक्षा सक्रियता पनि बढेको बताए । उनका अनुसार प्रहरीले सोमवार हवाइ गस्ती समेत गरेको छ । गाउँपालिकाको वडा नम्बर ५ मा केही हप्तादेखि विप्लवका गतिविधि बढेको उनले बताए । वडा नम्बर ३ को छेस्काममा प्रहरी चौकीमा आक्रमणको प्रयास भएको समेत हल्ला फैलिएको छ ।

सोलुखुम्बुका प्रमुख जिल्ला अधिकारी (सीडीओ) नरेन्द्रकुमार रानाले सुरक्षा सक्रियता बढाइएको बताए । ‘केही दिनदेखि स्थानीय स्तरमा विप्लव समूहका गतिविधि बढिरहेको अवस्था हो,’ उनले भने, ‘सुरक्षा निकायले निगरानी बढाएको छ ।’