काठमाडौं – क्रिकेट विश्वकपमा आइतवार लर्ड्सको मैदानमा पाकिस्तान र दक्षिण अफ्रिका भिड्दैछन् । 

पाकिस्तानले इंग्ल्यान्डलाई हराएर शानदार शुरूआत गरेको भए पनि पछि खराब खेल्दै गयो । दक्षिण अफ्रिकाले भने शुरूआती खेलहरू लगातार हार्दै अफगानिस्तानविरुद्ध बल्ल जीतको खाता खोलेको थियो । 

अर्थात् यी दुवै टीमका लागि यो विश्वकप स्मरणीय छैन । एकदुईवटा म्याचबाहेक यी दुवैले राम्रो प्रदर्शन गर्न सकेका छैनन् । दुवै टीमको ब्याटिङमा समस्या छ र टीममा सन्तुलन बन्न सकेको छैन । 

बलरहरूले भने ब्याट्स्म्यानको तुलनामा राम्रो प्रदर्शन गरेका छन् तर उनीहरूले पनि यदाकदा निराश बनाएका छन् । दक्षिण अफ्रिकाको ब्याटिङ क्विन्टन डी कक र कप्तान फाफ डुप्लेसीवरिपरि मात्र घुम्ने गरेको छ । 

हाशिम अमलाले न्युजील्यान्डविरुद्धको खेलमा अर्धशतक लगाएको भए पनि उनको फर्म कायम रहने नरहने टुंगो छैन । बलिङमा लुंगी न्गिदी फर्किंदा दक्षिण अफ्रिका बलियो बनेको छ । न्गिदीले न्युजील्यान्डविरुद्धको खेलको अन्तिम ओभरतिर महत्त्वपूर्ण विकेट लिएर रोमाञ्च ल्याएको भए पनि जीत दिलाउन सकेका थिएनन् । 

दक्षिण अफ्रिकाले अब सबै म्याचमा सतर्क हुनुपर्नेछ किनकि हरेक म्याचमा जिते मात्र ऊ सेमिफाइनल पुग्ने सम्भावना रहन्छ । 

पाकिस्तानको कुरा गर्दा उसको ब्याटिङका साथै फील्डिङ खराब छ । टीमका फील्डरहरूले महत्त्वपूर्ण क्याच छोड्ने गरेका छन् । उनीहरू रन पनि बचाउँदैनन् । पाकिस्तानले हरेक खेलमा ३० देखि ४० रन बढी दिने गरेको छ र ब्याट्स्म्यानहरूले त्यसको भरपाइ गर्न सकेका छैनन् । 

इमाम उल हक र फखर जमानले दक्षिण अफ्रिकाका तीव्र गतिका बलरहरूविरुद्ध राम्रो शुरूआत दिनुपर्ने हुन्छ । मोहम्म्द हफीज, शोएब मलिक, बाबर आजम, सरफराज अहमदले पनि इमरान ताहिरको स्पिनबाहेक क्रिस माउरिस र एन्डिले फेहुलकवायोको बलिङको डटेर सामना गर्नुपर्ने हुन्छ । 

बलिङमा पाकिस्तानले मोहम्मद आमिर र वहाब रियाजमा भर परेको छ । यी दुईले राम्रो बलिङ गरेका छन् । 

यी दुवै टीमको एक एक खेल वर्षाले हुन दिएन र आजको म्याचमा पनि पानी पर्न सक्छ । तर लर्ड्समा अहिलेसम्म पानी नै परिसकेको छैन र पिचले ब्याट्स्म्यानहरूलाई सहायता गर्ने आशा छ ।

एजेन्सी