काठमाडौं – कास्कीको पोखरादेखि उत्तरतर्फ अन्नपूर्ण गाउँपालिका (साविकको घान्द्रुक गाउँ विकास समिति वडा नम्बर ७) मा बल्लोपल्लो घरमा मिलिजुली नै बसेका थिए मनप्रसाद गुरुङ र कुमार गुरुङ ।

२० वर्षअघि अर्थात् २०५६ माघ ४ गते बेलुका एकै वंशका दुवै दाजुभाइ ३१ वर्षीय मनप्रसाद र ५६ वर्षीय कुमारबीच मदिरा खाने सल्लाह भयो ।

साँझपख घरेलु मदिरा खानेगरी कुमार मनप्रसादको घरमा आए । जब मदिराको नशा चढ्न थाल्यो, तब ‘हङकङ आईडी’को विषय उठ्यो । आईडीलाई लिएर विवाद उग्र रुप लियो । जुन विवादले एकैछिनमा हत्याको रुप लियो ।

जिल्ला प्रहरी कार्यालय पोखराका अनुसार कुमारसँग हङकङ आइडी थियो । त्यो आईडी अरुले समेत बोकेर हङकङ जान मिल्ने व्यवस्था उतिबेला थियो । कुमारसँग भएको आईडी मनप्रसादले लिन खोजेपछि विवाद बढ्यो । 

घटनास्थलमा कुमार र मनप्रसादका परिवारका सदस्य पनि थिए । विवाद हुँदाहुँदै नजिकै भएको खुर्पा (काठ–दाउरा चिर्न प्रयोग गरिने धारिलो हतियार) ले कुमारले मनबहादुरलाई टाउकोमा हिर्काए । घाइते भएका मनप्रसादको ५ गते बिहान मृत्यु भयो ।

आईडी जोगाउन खोज्दा भएको विवादका क्रममा मनप्रसादको मृत्यु भएपछि कुमार गाउँबाट भागे । प्रहरीका अनुसार उनी म्याग्दी जिल्लाका विभिन्न ठाउँमा बस्दै आएका रहेछन् ।
झण्डै २ दशकअघि भएको हत्या घटनाका अभियुक्त कुमारलाई प्रहरीले पक्राउ गर्न सकेको थिएन । जब प्रहरी उपरीक्षक (एसपी) दानबहादुर कार्की कास्की जिल्लाको प्रमुख भएर गए, तब उनले पुराना अपराधका फाइल अध्ययन गर्न थाले ।

‘समाज र घरपरिवारले भुलिसकेको अपराधीलाई कानूनले कहिल्यै पनि भुल्न सक्दैन’ भन्ने मनन् गरेर कुमार लगायतका अन्य पुराना फाइललाई अगाडि बढाएको जिल्ला प्रहरी कार्यालय कास्कीका प्रमुख प्रहरी उपरीक्षक (एसपी) दानबहादुर कार्कीले बताए । ‘समाज, छरछिमेक र स्वयं पीडित परिवारले नै लामो समयपछि अपराधी भुलिसकेको हुन्छ तर कानूनले भने भुल्ने भन्ने हुँदैन । त्यसैले कतै हत्यारा यतै पो छन् कि भनेर प्रहरी खटायौं,’ उनले भने । प्रहरीलाई साउन ४ गते सूचना आयो – कुमार आफ्नै घरमा केही महिनादेखि बस्दै आएका छन् । उनलाई प्रहरीले सोही दिन आफ्नै घर घान्द्रुकबाट पक्राउ गर्न सफल भयो ।

‘घटनालगत्तै फरार कुमार म्याग्दी जिल्लाका विभिन्न स्थानमा लुकिछिपी बसेको, करीब २ वर्षपछि भारततर्फ गएको, करीब १४ वर्ष भारत बसेर बुवाको मृत्युपश्चात् घर फर्केको र कास्की जिल्लाकै विभिन्न स्थानमा लुकिछिपी बसेको अवस्थामा उनकै घरबाट प्रहरीले पक्राउ गर्न सफल भएको हो,’ एसपी कार्कीले लोकान्तरसँग भने ।

उनलाई कर्तव्य ज्यान मुद्दा अन्तर्गत कारवाही भइरहेको प्रहरीले जनाएको छ ।