रुकुमपूर्व – जिल्लास्थित स्थानीय तहले कतै लक्ष्यभन्दा दोब्बर राजश्व संकलन गरेका छन् भने कतै लक्ष्यको आधा पनि राजश्व संकलन गर्न सकेका छैनन् । 

रुकुमपूर्वमा सिस्ने गाउँपालिकाले लक्ष्यभन्दा दोब्बर राजश्व संकलन गर्न सफल भएको छ । पुथा उत्तरगङ्गा गाउँपालिकाले भने लक्ष्यको आधा पनि राजश्व संकलन गर्न नसकेको हो । रु ३६ लाख ७७ हजार राजश्व संकलन गर्ने लक्ष लिएकोमा सिस्ने गाउँपालिकाले रु ७५ लाख ६ हजार ६०० राजश्व संकलन गरेको जनाएको छ । 

गाउँपालिकाले लक्ष्यभन्दा १०४ प्रतिशत बढी राजश्व उठाएको प्रमुख प्रशासकीय अधिकृत विमला रोकाले जानकारी दिए । गाउँपालिकाका विभिन्न वडाबाट गरी रु ३७ लाख पाँच हजार ८०  संकलन भएको छ ।

गत आर्थिक वर्षमा बालुवा, जडीबुटी, मालपोत कार्यालयबाट राम्रो राजश्व संकलन गर्न सफल भएकोले गाउँपालिकाले दोब्बर राजश्व संकलन गर्न सफल भएको गाउँपालिका अध्यक्ष कुमारी बरालले बताइन् । गाउँपालिकाले चालू आर्थिक वर्षमा बढाएर रु ७८ लाख राजश्व संकलन गर्ने लक्ष राखेको पनि उनले जानकारी दिइन् ।

गतवर्ष सङ्कलित राजश्वलाई हेरेर चालू आर्थिक वर्षको लक्ष्य तय गरिएको उनको भनाइ छ ।

गाउँपालिकाले बर्सेनि राजश्व संकलनलाई बढाउँदै लगेको छ । गाउँपालिकाले आर्थिक वर्ष २०७४/७५ मा १८ लाख ३० हजार २९४ राजश्व संकलन गरेको थियो ।

पुथा उत्तरगङ्गा गाउँपालिकाले अर्थिक वर्ष २०७५/७६  मा लक्ष्यको आधा पनि राजश्व संकलन गर्न नसकेको पाइएको हो ।

रु एक करोड ८ लाख राजश्व उठाउने लक्ष्य राखेको गाउँपालिकाले जम्मा रु ४५ लाख मात्र राजश्व संकलन गर्न सफल भएको गाउँपालिकाले जनाएको छ । 

गाउँपालिकाले राजश्वको प्रमुख स्रोतका रूपमा यार्सागुम्बालाई लिएको थियो तर, यार्सागुम्बाबाट राजश्व संकलन हुन नसक्दा लक्ष्यअनुरूप राजश्व संकलन हुन नसकेको प्रमुख प्रशासकीय अधिकृत रवीन्द्र बुढाथोकीले बताए । 

गत वर्षमा लक्ष्यअनुरूप राजश्व संकलन हुन नसकेपछि चालू आर्थिक वर्षमा गाउँपालिकाले राजश्वको लक्ष्य ह्वात्तै घटाएको छ ।

चालू आर्थिक वर्षमा गाउँपालिकाले यार्सालाई राजश्वको स्रोतबाट हटाउँदै रु ५० लाखको मात्र लक्ष लिएको छ । 

त्यसैगरी भूमे गाउँपालिकाले गत आर्थिक वर्ष २०७५/७६ मा ४५ लाख ३० हजार राजश्व संकलन गर्ने लक्ष्य लिएकोमा रु ४३ लाख ५३ हजार राजश्व संकलन गर्न सफल भएको छ ।

गाउँपालिका लक्ष्यको ९६ प्रतिशत राजश्व संकलन गर्न सफल भएको प्रमुख प्रशासकीय अधिकृत चन्द्रसिङ श्रेष्ठले जानकारी दिए ।

गाउँपालिकाले प्राकृतिक स्रोतसाधनबाट कम राजश्व उठेको बताएको छ । सेवा शुल्क, घरबहाल कर, सिफारिस दस्तुर र मालपोत नै राजश्वका प्रमुख स्रोत भएको प्रशासकीय अधिकृत श्रेष्ठले बताए ।

गत वर्षको तुलनामा चालू आर्थिक वर्षमा बढाएर राजश्व रु ४९ लाख २४ हजारको लक्ष्य लिएको गाउँपालिका अध्यक्ष रामसुर बुढामगरले बताए ।

कर प्रणालीमा सुधार गर्न सकेमा चालू आर्थिक वर्षमा केही सुधार हुनसक्ने अनुमान गरिएको उनको भनाइ छ । 

यतिमात्र नभएर चालू आर्थिक वर्षमा व्यवसाय रजिष्ट्रेशन र नवीकरण, घर बहाल करमा राजश्व बढ्ने अनुमान गरिएको प्रशासकीय प्रमुख श्रेष्ठले बताए ।