काठमाडौं – विद्युतीय सामानको कारोबार गर्ने भारतीयले नेपालमा ठूलो परिणाममा लागूऔषध भित्र्याउने गरेको तथ्य खुलेको छ ।

लागूऔषध नियन्त्रण ब्यूरोले असोज १ गते ३ जना भारतीयसहित ४ जना नेपालीलाई ठूलो मात्रामा नियन्त्रित मनोद्विपक पदार्थ एम्पुल ४ हजार ३ सय २६ वटासहित पक्राउ परेसँगै तस्करीको रहस्य खुलेको हो ।

पुरुषोत्तमपुर बैरगनिया बस्ने ३७ वर्षीय अभिषेककुमार जयसवाल, ३७ वर्षीय राजा कुणाल र ३२ वर्षीय राजेशकुमार जयसवाललाई लागूऔधध नियन्त्रण ब्यूरोले भारतीय नम्बर प्लेटको बीआर ३० पी ८६०७ नम्बरको सेतो स्कर्पियोसहित पक्राउ परेको लागूऔषध नियन्त्रण ब्यूरोका प्रहरी वरिष्ठ उपरीक्षक एसएसपी वसन्त लामाले बिहीवार पत्रकार सम्मेलनमा बताए ।

एसएसपी लामाले भने, ‘यी मध्येका १ जना अभिषेककुमार जयसवालले विद्युतीय सामानको होलसेल कारोबार गर्दै आएका थिए । यसैको आडमा लागूऔषधको कारोबार गर्दै आएको अनुसन्धानमा देखिएको छ ।’

भारतीयले चामल र पिठोभित्र लुकाएर डाइजेपाम १०४७ एम्पुल, नर्फिन १०३७ एम्पुल, र फेनारगन १०४२ एम्पुलसहित पक्राउ गरेको छ ।

जेल सजाय भुक्तान गरेपछि लागूऔषधको धन्दा

भदौ २७ गते लागूऔषध नियन्त्रण ब्यूरोले काठमाडौंको गोकर्णेश्वर नगरपालिका–५ जम्बु डाँडाबाट ४ जना नेपालीलाई नियन्त्रणमा लियो । सिराहा गोलबजार नगरपालिकाका ४२ वर्षीय उतिमलाला साह, उदयपुर त्रियुगा नगरपालिकाका ३४ वर्षीय सुजेन्द्र लोहनी, काभ्रे रोशी गाउँपालिकाका २८ वर्षीय पेमा लामा र सिराहा गोलबजार नगरपालिकाका २३ वर्षीय अशोक तामाङलाई प्रहरीले नियन्त्रित डाइजेपाम, फेनारगन र नुर्फिम १२ सय एम्पुल पनि बरामद गर्‍यो ।

‘अनुसन्धान गर्दै जाँदा उनीहरू सबै जना यसभन्दा अगाडि कर्तव्य ज्यान मुद्दा, लागूऔषध, डाँकाचोरी लगायतका मुद्दामा ३/४ बर्ष जेलमा कैद भुक्तान गरेको देखियो,’ एसएसपी लामाले भने ।

पक्राउ परेका उतिमलाल साह कर्तव्य ज्यान मुद्दामा २ वर्ष ९ महिना सिराहा कारागारबाट कैद भुक्तान गरेको,  सुजेन्द्र लोहनी लागूऔषध मुद्दामा २ वर्ष सिराहा कारागारबाट कैद भुक्तान गरेको, पेमा लामा डाँकाचोरी मुद्दामा ३ वर्ष ४ महिना काभ्रे तथा सिराहा कारागारबाट कैद भुक्तान गरेको र अशोक तामाङ बलात्कार मुद्दामा २ वर्ष ६ महिना सिराहा कारागारबाट कैद भुक्तान गरिसकेका व्यक्ति रहेको लामाले बताए ।