बुटवल-रूपन्देहीको बुटवलमा यही असोज १७ गते बाख्रा चराउन गएको एक महिलाको हत्यामा संलग्नलाई प्रहरीले पक्राउ गरेको छ ।

बुटवल–३ ज्योतिनगर की ६६ वर्षिया टिकीसरा गुरूङ बाख्रा चराउन गएको समयमा जंगलमा हत्या गर्ने घटनामा संलग्न भएको आरोपमा मकवानपुर जिल्लाको हेटौडा उपमहानगरपालिका–६ का ४२ वर्षिया राम लामालाई प्रहरीले पक्राउ गरेको हो ।

गुरुङलाई धारिलो हतियार प्रयोग गरी हत्या गरिएको अवस्थामा जंगलमा शव फेला परेको थियो । गुरूङलाई टाउको पछाडि गर्धनको भागमा धारिलो हतियार प्रयोग भएको देखिन्छ ।

इलाका प्रहरी कार्यालय, बुटवलले सोमबार पत्रकार सम्मेलन गरी बुटवल–३ डेरा गरी बस्ने लामालाई नुवाकोट जिल्ला बेलकोटगढी नगरपालिका–५ कोल्पुटार ससुरालीबाट पक्राउ गरेको जानकारी दिएको छ ।

कार्यालयका प्रहरी नायव उपरीक्षक भीमलाल  भट्टराईले आर्थिक लेनदेवको विषयमा झगडा भएपछि गुरूङलाई लामाले हत्या गरेको अनुसन्धानबाट खुलेको बताए ।

लामालाई प्रहरीले सोमबार बुटवलमा सार्वजनिक समेत गर्‍यो । ‘लामाले हत्या गरेपछि गुरूङले लगाएका गरगहना पनि लुटपाट गरेर लगेको थियो’ भट्टराईले भने, ‘लामालाई प्रहरी हिरासतमा राखी कर्तव्य ज्यान र डाँका चोरी मुद्दामा थप अनुसन्धान भइरहेको छ ।’