बाँस्कोटा घुस बार्गेनिङ काण्ड : ओलीलाई संसदमा उपस्थितिको लागि ‘रुलिङ’ गर्न कांग्रेसको माग

प्रमुख प्रतिपक्षी दल नेपाली कांग्रेसले सेक्युरिटी प्रेस खरिद सम्बन्धमा निवर्तमान सञ्चारमन्त्री गोकुल बाँस्कोटाले ७० करोड रुपैयाँ बार्गेनिङ गरेकोबारे जवाफ दिन प्रधानमन्त्री केपी शर्मा ओलीलाई संसदमा उपस्थितिको लागि ‘रुलिङ’ गर्न माग गरेको छ ।

प्रधानमन्त्रीले सांसद र जनताको प्रश्नको जवाफ दिने सामर्थ्य नराखेपनि सदनले राख्नुपर्ने कांग्रेसको भनाइ छ ।


Advertisement

मंगलवार बसेको प्रतिनिधिसभा बैठकको विशेष समयमा कांग्रेस सांसद गगन थापाले ७० करोड बार्गेनिङ सम्बन्धमा प्रधानमन्त्रीले सदनमा जवाफ दिनुपर्ने माग गरे ।

‘सञ्चारमन्त्री र विजय मिश्रबीच भएको अडियोबारे प्रधानमन्त्री २ महिना अगावै जानकार हुनुहुन्थ्यो भन्ने दाबी समाचारमा आएका छन्, यसको बारेमा संसदमा आएर आँखामा आँखा जुधाएर नागरिक र हाम्रा प्रश्नको जवाफ दिने हिम्मत प्रधानमन्त्रीज्यूसँग छ कि छैन ?’ उनले भने, ‘प्रधानमन्त्रीसँग हिम्मत छ कि छैन मलाई थाहा छैन सभामुख महोदय, तर संसदसँग यो हिम्मत हुनुपर्छ । ध्यानाकर्षण मात्र होइन सभामुख महोदय संसदले यो सामर्थ्य राख्नैपर्छ । सम्माननीय प्रधानमन्त्रीजी डाँडाकाडाँ डुलेर बस्ने होइन, तालतलैया हेरेर बस्ने होइन सदनमा आउनुपर्छ । यहाँ उभिनुपर्छ, हाम्रो प्रश्नको सामना गर्नुपर्छ । यहाँ बसेर उहाँलाई निम्छरो प्रश्न होइन, सही प्रश्न सोध्ने छौं ।’


Advertisement

सांसद थापाले प्रधानमन्त्रीलाई सदनमा उपस्थित हुनको लागि रुलिङ गर्न सभामुखसँग आग्रह गरे । त्यसअघि संसदको बैठकको शुरूमा कांग्रेस सांसद मीनेन्द्र रिजालले यो प्रसङ्ग उठाएपछि सभामुख अग्नि सापकोटाले यसबारे सदनको ध्यानाकर्षण भएको र लेखा समितिले छानबिन गरिरहेको बताएका थिए । 

सेक्युरिटी प्रेस, स्याटेलाइट खरिद लगायत सबै विषयमा प्रधानमन्त्री ओली जानकार नै रहेको सांसद थापाले दाबी गरे । ‘प्रधानमन्त्रीले के भन्नुहुन्छ थाह छैन तर आसेपासेले एउटै कुरा भनेका छन्, प्रधानमन्त्रीलाई केही थाहा थिएन । प्रधानमन्त्रीको चुलो चलाउने, प्रधानमन्त्रीको तुलामो राख्दा कसैले नभ्याउने अनि पधानमन्त्रीको भनाइका आधारमा काभ्रेले जन्माएको सर्वाधिक प्रतिभाशाली सरकारको प्रवक्ताको बारेमा तपाईंलाइ थाहा थिएन भनेर हामीले प्रत्याइदिनुपर्ने ? पत्याउने हो भने प्रधानमन्त्रीलाई हाम्रो प्रश्न हुन्छ – यो थाहा छैन भने तपाईंलाई के थाहा छ ?’ गगनले प्रश्न गरे । 

अप्टिकल फाइबर लगायत सबै कुरा थाहा भएपनि परिस्थिति नियन्त्रणबाहिर गएपछि गोकुल बाँस्कोटालाई बलिको बोको बनाइएको भनेर बाहिर टिप्पणी भइरहेको उनले दाबी गरे । 

प्रधानमन्त्रीले जवाफ दिने विश्वासमा सदनको गतिरोध हटाएको रिजालले बताएका थिए । समाजवादी पार्टीकी सरिता गिरीले ७० करोड बार्गेनिङबारे संसदीय छानबिन समिति र राजपाका प्रमोद साहले सदनमा प्रधानमन्त्रीको जवाफ माग गरेका थिए । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्