कोरोना नियन्त्रणको लागि ठोस निर्णय बिना नै सुदूरपश्चिम प्रदेश सरकारको बैठक टुंगिएको छ । मुख्यमन्त्री त्रिलोचन भट्टको अध्यक्षतामा शुक्रबार बसेको प्रदेश स्तरीय कोरोना नियन्त्रण समितिको बैठकले सचेतनामूलक कार्यक्रम प्रवाह गर्ने, अत्यावश्यक काम बाहेक भारततर्फ आमनागरिकलाई नजानलगायत आग्रह गर्न बाहेक ठोस निर्णय भने गर्न नसकेको पाइएको हो ।

बैठकपछि सञ्चारकर्मीहरुलाई प्रतिक्रिया दिदै मुख्यमन्त्री भट्टले कोराना भाइरसको रोकथामको लागि भन्दै बढी भिडभाड हुने मालपोत, यातायातलगायत सरकारी कार्यालयहरु बन्द गर्ने तयारीमा जुटेको बताए ।

तर उनले भने, ‘केही दिन रोक्दा फरक नपर्ने कार्यालयहरु केही दिन रोक्नु पर्छ कि भनेर संघीय सरकारसँग समन्वय गर्ने छलफल भएको छ ।’

त्यस्तै, भारतसँग जोडिएका सुदूरपश्चिमको २ वटा नाकाबाहेक सबै नाकाहरु बन्द गर्न समन्वय भइरहेको मुख्यमन्त्री भट्टले बताए । मुख्यमन्त्री भट्टले अगाडी थपे, ‘यहाँका सबै सीमा नाका खुला छन् हाम्रो प्रदेशमा । सबै नाकाहरुलाई खुला नगरेर हामी संघीय सरकारसँग भन्दैछौ, २ वटा मुख्य नाकाबाहेक अन्य नाका सील गर्नको लागि पनि संघीय सरकारसँग राख्ने भनेका छौ ।’

मुख्यमन्त्री भट्टले कोरोना नियन्त्रणमा बजेटको कुनै अभाव नहुने बताएका छन् । यसैबीच सञ्चारकर्मीले रोग जाँचको लागि काठमाडौं नै नमूना पठाउनुपर्ने बाध्यता अन्त्य गर्न प्रयोगशालाको निर्माण गर्न सक्ने अवस्था छ ? भनेर सोधेको प्रश्नमा उनले भने, ‘ल्याब त हामीले स्थापना गर्न सक्छौ, पैसाको कारणले रोकिदैन । तर त्यसको लागि विश्व स्वास्थ्य संगठन (डब्लुएचओ)ले पनि केही गर्दो रहेछ । यसको लागि पनि संघीय सरकारसँग कुरा गरिरहेका छौ । यो हुँदा सबभन्दा उचित त्यही हो, हाम्रो जोड पनि हो । तर तत्काल संघीय सरकारको समन्वय र सहयोगबिना राख्न सक्ने स्थिति कम छ । म त यतिसम्म कुरा गरेको छु कि, प्रदेश प्रदेशमा नभएपनि नेपालगञ्जसम्ममा भए पनि हुन्छ ।’

यद्यपी बैठकका सहभागीहरुले कोरोनाको संक्रमण भित्रिन नदिन सुदूरपश्चिम प्रदेश लक डाउन गर्न आग्रह गरेका थिए । भारतसँगका सम्पूर्ण नाकाहरु पूर्ण रुपमा बन्द गर्न आग्रह गरेको बैठकमा सहभागी धनगढी उपमहानगरपालिकाका मेयर नृप बहादुर वडले बताए ।

साथै संक्रमण फैलिन नदिन अपनाउनु पर्ने पूर्वसावधानी र तयारी आवश्यक भएकोमा जोड दिएका सहभागीहरुले संक्रमण फैलिएको अवस्थामा संक्रमितहरुको उपचारका लागि छुट्टै आईसोलेसन वार्ड, उपकरण, चिकित्सक लगायत आवश्यक सम्पूर्ण चिजलाई तयारी हालतमा राख्न समेत आग्रह गरेको जनाइएको छ ।