नेकपामा सरकारको निर्णयलाई लिएर तीव्र असन्तुष्टि, तत्काल सचिवालय बैठक बोलाउन माग

फाइल तस्वीर

सत्तारूढ दल नेपाल कम्युनिस्ट पार्टी (नेकपा)का वरिष्ठ नेता झलनाथ खनालले अध्यक्ष पुष्पकमल दाहाल ‘प्रचण्ड’लाई फोन गरेर सचिवालय बैठक बोलाउन आग्रह गरेका छन् ।

स्वास्थ्य सामग्री ल्याउने क्रममा चरम भ्रष्टाचार भएको आफूले सुनेको भन्दै खनालले यो विषयमा पार्टीभित्र छलफल गर्नुपर्ने आवश्यकता देखिएको भन्दै प्रचण्डलाई बैठक बोलाउन आग्रह गरेको खनालनिकट स्रोतले जनायो ।


Advertisement

‘मैले अध्यक्ष प्रचण्डलाई फोन गरेर तत्काल सचिवालय बैठक बोलाउन आग्रह गरेको हुँ,’ खनालको भनाइ उधृत गर्दै उनीनिकट स्रोतले लोकान्तरसँग भन्यो, ‘अहिले सरकार विषम परिस्थितिमा छ । एकपछि अर्को विवादास्पद निर्णय गरिरहेको छ । मिडियाले तारन्तार फोन गरेर सोधिरहेका छन् । बैठक बोलाएर यसलाई तुरुन्त छिनोफानो गर्नुपर्यो ।’

शुक्रवार अपराह्न लोकान्तरसँगको छोटो कुराकानीमा वरिष्ठ नेता खनालले बैठक नै नबसेकाले मेडिकल सामान ल्याउँदा भ्रष्टाचार भएको बारेमा पार्टीले आधिकारिक धारणा कसरी सार्वजनिक गर्ने भन्दै प्रतिप्रश्न गरेका थिए ।


Advertisement

नेकपाका एक अर्का सचिवालय सदस्यले सरकारले एकपछि अर्को विवादास्पद काममा फँसेको बताए । ‘पहिला मेडिकल किट ल्याउँदा भ्रष्टाचार भएको कुरा आए, त्यसपछि नेपाली सेनालाई जिम्मेवारी दिने कुरा आएको छ । यो विषयमा पार्टीभित्र तत्काल गहन छलफल हुनुपर्छ । अहिले सरकार र पार्टीबीच कुनै समन्वय देखिएको छैन,’ उनले भने ।

स्रोतका अनुसार शुक्रवार अधिकांश सचिवालय सदस्यहरूबीच फोन कुराकानी भएको थियो । कुराकानीमा पछिल्लो राजनीतिक अवस्था, सरकारका विवादास्पद निर्णय लगायतका विषयहरू समेटिएको नेकपा स्रोतले बताएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्