उदयपुरमा थप ८ जना नेपालीमा कोरोना संक्रमण पुष्टि : स्वास्थ्य मन्त्रालय

स्वास्थ्य तथा जनसंख्या मन्त्रालयले उदयपुरमा थप ८ जनामा कोरोना भाइरस संक्रमण देखिएको पुष्टि गरेको छ ।

मंगलवार पुष्टि भएका कोरोना संक्रमित सबै नेपाली हुन् । जसमा ७ पुरुष र १ महिला रहेका छन् ।

स्वास्थ्य मन्त्रालयका सचिव यादव कोइरालाले मस्जिदमा भेटिएका १२ जना कोरोना संक्रमितको सम्पर्कमा रहेका ७९ जनाको स्वाब परीक्षण गर्दा थप ८ जनामा संक्रमण भेटिएको बताए ।

उदयपुरबाट संकलन भएको स्वाबको नमूना कोशी अञ्चल अस्पतालपछि बीपी कोइराला स्वास्थ्य विज्ञान प्रतिष्ठान धरानमा पुनः परीक्षण गर्दा संक्रमण पुष्टि भएको छ । पुनः परीक्षण गर्दा ८ जनामा कोरोना संक्रमण ‘पोजेटिभ’ देखिएको छ ।

संक्रमित व्यक्तिहरू लकडाउनको बेला भारतबाट राजविराज हुँदै उदयपुर पुगेका स्रोतले जनाएको छ । यसअघि उदयपुरमा १२ जना र मंगलवार नै १ जना कोरोना संक्रमित भेटिएका थिए । अब देशभर कोरोना संक्रमितको संख्या ४० पुगेको स्वास्थ्य मन्त्रालयले जनाएको छ । जसमध्ये ५ जना उपचारपछि निको भइसकेका छन् ।