कोरोना भाइरस संक्रमण रोकथामका लागि सरकारले अझै केही दिन लकडाउन बढाउने तयारी थालेको छ । 

गृहमन्त्री रामबहादुर थापा ‘बादल’, गृहसचिव, परराष्ट्र सचिव, स्वास्थ्य मन्त्रालयका प्रतिनिधि, नेपाल प्रहरी, सशस्त्र प्रहरी, राष्ट्रिय अनुसन्धान विभागका प्रमुख, नेपाली सेनाका रथी प्रभुराम शर्मा लगायत उपस्थिति गृह मन्त्रालयमा भएको बैठकमा सुरक्षा निकायका प्रमुखहरूले लकडाउन बढाउनुपर्ने सुझाव दिएका छन् ।

सुरक्षा निकायका अधिकारीले देशका अन्य क्षेत्रमा लकडाउनल केही खुकुलो गरेपनि भारतसँग सीमा जोडिएका जिल्लामा तत्काल लकडाउन खुकुलो गर्न नहुने सुझाव दिएको बैठकमा सहभागी एक अधिकारीले लोकान्तरलाई जानकारी दिए ।

सुरक्षा निकाय र स्वास्थ्य मन्त्रालयका प्रतिनिधिको समेत सुझाव सुनेपछि गृहमन्त्री थापाले वैशाख २५ गतेपछि पनि लकडाउन थपिने संकेत गरेका थिए ।

‘लकडाउन वैशाख २५ गतेपछि पनि थप्नुपर्ने अवस्था देखिएको छ । कोरोना संक्रमण कम देखिएका क्षेत्रमा लकडाउन केही खुकुलो गर्ने तयारी गरिएको छ,’ गृहमन्त्री थापाको भनाइ उदृत गर्दै स्रोतले भन्यो, ‘वैशाख २४ गतेसम्म त्यसको मोडालिटी तयार हुन्छ ।’

बैठकमा नेपालगञ्जमा पछिल्लो समय समुदायस्तरमै कोरोना संक्रमण देखिएको भन्दै सीमामा थप कडाइ गर्ने निर्णय गरिएको छ । बैठकले कारागार, सरकारी संरचना, विकास निर्माण आयोजना लगायतका महत्त्वपूर्ण संरचनाको सुरक्षाको जिम्मा नेपाली सेनालाई दिएर त्यहाँ खटिएका नेपाल प्रहरी र सशस्त्र प्रहरीलाई सीमामा पठाउने सम्बन्धी प्रक्रिया अगाडि बढाउने निर्णय समेत गरेको छ ।