नेपालमा कोरोनाभाइरस (कोभिड- १९) का संक्रमितको संख्या ८ सय ८६ पुगेको छ ।

नेपालमा थप १ सय १४ जना संक्रमित भेटिएको जानकारी स्वास्थ्य तथा जनसंख्या मन्त्रालयले बुधवार पत्रकार सम्मेलन गरी जानकारी दिएको छ ।

एकै दिनमा सयभन्दा बढी संक्रमित थपिएको आज पहिलोपटक हो । यसअघि मंगलवार ९० जना संक्रमित थपिएका थिए ।

संक्रमितमध्ये धरानमा गरिएको परीक्षणमा सप्तरीका ११ जनामा संक्रमण पुष्टि भएको छ । त्यस्तै कोशी प्रादेशिक अस्पतालमा गरिएको परीक्षणमा झापाका १५ जना संक्रमित भेटिएका छन् ।

हेटौंडामा गरिएको परीक्षणमा एक जना हेटौंडाबासी र रौतहट गढीमाईका ८ जनामा संक्रमण भेटिएको स्वास्थ्य मन्त्रालयका प्रवक्ता डाक्टर विकास देवकोटाले जानकारी दिए ।

पोखरामा गरिएको परीक्षणमा बाग्लुङका ६ जनामा संक्रमण देखिएको छ भने दाङमा गरिएको परीक्षणमा रूकुम पूर्वका ३ जना, घोराहीका ७ जना, लमहीका ८ जनामा संक्रमण देखिएको छ ।

भेरी अस्पतालमा गरिएको परीक्षणमा बाँकेका १६ जनामा संक्रमण देखिएको छ भने राष्ट्रिय जनस्वास्थ्य प्रयोगशाला टेकुमा गरिएको परीक्षणमा सिराहाका १ जना, स्थायी ठेगाना सिराहा भई हाल सप्तरी रहेका १ जना, बाराका ७ जना, रौतहट ठेगाना भई बारामा रहेका १ जना, रौतहटका २६ र मदरसामा रहेका २ जनामा संक्रमण भेटिएको हो ।