सुदूरपश्चिम प्रदेशमा कोरोना भाइरस (कोभिड १९) परीक्षण गर्ने आरटी–पीसीआर मशिन सहितका आवश्यक उपकरण खरिद टेन्डरमा अनियमिता भएको तथ्य बाहिर आएपछि अख्तियार दुरुपयोग अनुसन्धान आयोग कञ्चनपुरले अनुसन्धान गर्ने भएको छ ।

लोकान्तर डटकममा ‘पीसीआर मशिन खरिदमा अनियमिताको गन्ध, सरकारी कागजात कीर्तेका अभियुक्तलाई ठेक्का’ शीर्षकको समाचार प्रकाशित भएपछि आयोगले सोही समाचारको आधारमा उजुरी कायम गरी अनुसन्धान गर्ने भएको हो । 

आयोगको कञ्चनपुुर कार्यालयका निमित्त प्रमुख महेश पाण्डेयले सामाचारको आधारमा उजुरी कायम गरेको बताउँदै छिट्टै अनुसन्धान थालिने जानकारी दिए । प्रदेश सरकारको सामाजिक विकास मन्त्रालय मातहतको प्रदेश स्वास्थ्य आपूर्ति व्यवस्थापन केन्द्रले पीसीआर मशिन सहितको उपकरण खरिदको लागि आह्वान गरेको टेन्डर तथा छनौट प्रक्रियाबारे अनुसन्धान हुने भएको छ ।

सार्वजनिक खरिद ऐन अनुसार कम मूल्यमा वस्तु उपलब्ध गराउने टेन्डरलाई ठेक्का दिनुपर्नेमा बढी मूल्य कबुल गर्ने सरकारी कागजात कीर्ते गरी टेन्डर हत्याउँदै आएका अभियुक्त तथा व्यवसायी दृष्यन्त बस्नेतलाई आपूर्ति व्यवस्थापन केन्द्रले ठेक्का दिएको छ तर आपूर्ति व्यवस्थापन केन्द्रका निर्देशक डा. गुणराज अवस्थीले सार्वजनिक खरिद अनुुसार नै ठेक्का दिएको दाबी गरे ।

आपूर्ति व्यवस्थापन केन्द्रले २ प्याकेजमा बायोसेफ्टी लेवल–२ प्रयोगशालाका लागि उपकरण खरिदको विद्युतीय बोलपत्र आह्वान गरिएको थियो । पहिलो प्याकेज अन्तर्गत आरटी–पीसीआर, अटोमेटेड न्युक्लिक एसिड अक्सट्रक्सन सिस्टम र आरएनएन अक्सट्रक्सन किट खरिद गर्नुपर्ने थियो ।

दोस्रो प्याकेज अनुसार ल्याबोरोटरी इक्युपमेन्ट र कन्जमबलस् खरिद गर्नु भनिएको थियो । जसमा सेरो डाइग्नोस्टिक टे«डर्स नेपालले पहिलो प्याकेजको लागि मात्रै भनेर २ करोड ७६ लाख ४३ हजार ६८७ कबोल रकम राखेको थियो भने बायोमेड इन्टरनेसनल प्रालिले २ वटै प्याकेजका लागि भन्दै ३ करोड ३६ लाख ९० हजार ९५० रुपैयाँ कबोल रकम उल्लेख गरेको थियो तर दुई वटै प्याकेजको लागि भन्दै व्यवसायी बस्नेतको फर्म डीबी मेडिसिनले ९१ लाख १ हजार ५० रुपैयाँ बढी रकम ४ करोड ८३ लाख ५४ हजार ९६० (१३ प्रतिशत मूल्य अभिवृद्धि करसहित) कबोल रकम राखे पनि छनोटमा पारिएको छ ।