बेलायतको लेस्टरशायर प्रहरीले आफूहरूलाई लक्षित गरी थुक्ने र खोक्ने क्रम बढ्दै गएको भनी चिन्ता व्यक्त गरेको छ । कोभिड–१९ ले बेलायतलाई आक्रान्त पारेदेखि यस्तो आक्रमण बढेको उनीहरूको भनाइ छ । 

राष्ट्रव्यापी लकडाउनको पहिलो तीन महिनामा अपराधीहरूले अधिकारीतर्फ फर्केर थुक्ने र खोक्ने २०५ वटा केस दर्ता गरिएको पीए नामक समाचार संस्थाले खबर दियो । पोहोरको तुलनामा यसमा १०२ प्रतिशत वृद्धि भएको बताइएको छ । 

कुल ३८ जनालाई थुक्ने घटनाका लागि जिम्मेवार ठहर गरिएको छ । प्रहरीलाई तर्साउनका लागि खोक्ने काम लेस्टरशायरमा हुने गरेको थिएन र महामारीका बेलामा त्यसको दुरुपयोग गरिँदैछ । 

त्यसो त बेलायतभरि नै यस्ता गतिविधि बढेको बताइएको छ । विगत तीन महिनामा कम्तीमा यस्ता ७ हजार ८ सय ६३ वटा केस दर्ता गरिएका छन् । 

बेलायतका ५० प्रहरी विभागमध्ये ३१ ले यो आँकडा उपलब्ध गराएका हुन् । आम विरोध प्रदर्शन हुँदा तथा लकडाउन नमानी गरिएका पार्टीहरूलाई प्रहरीले रोक्न जाँदा यसरी अधिकारीहरूमाथि थुक्ने र खोक्ने क्रम बढेको बताइएको छ । 

‘यस्ता किसिमका आक्रमणले प्रहरी कर्मको हजारौं दिन नष्ट गरिदिन्छन्,’ लेस्टरशायर प्रहरी प्रमुख साइमन कोलले बताए । यस्तो किसिमको थुक आक्रमण घिनलाग्दो प्रवृत्ति भएको उनको कथन छ । 

संक्रमित भइने डरले प्रहरी अधिकारी तथा कर्मचारीमा शारीरिक र मानसिक असर पर्ने र समुदायमा पनि ठूलै असर पर्ने उनको भनाइ छ ।