धादिङमा कोभिड–१९ को जोखिम बढ्दै गएकाले स्थानीय सरकारले क्वारेन्टीनलाई थप व्यवस्थित गर्न थालेका छन् । 

कोरोना भाइरसको बढ्दो संक्रमण र नजिकिँदो चाडपर्वको कारण स्थानीय सरकारले क्वारेन्टीनको बसाइ आचारसंहिता निर्माणदेखि यसको व्यवस्थापनमा जुटेका हुन् ।

शुरूमा विद्यालय र सरकारी भवनमा क्वारेन्टीन सञ्चालन गरिएको थियो । कक्षा सञ्चालनको तयारीका लागि क्वारेन्टीन र आइसोलेसनका लागि प्रयोग गरिएको विद्यालयको भवन खाली गरिएको छ । स्थानीय सरकार नयाँ ठाउँमा बनाइएका क्वारेन्टीन र आइसोलेसनको राम्रो व्यवस्थापनमा जुटेका छन् । नयाँ ठाउँमा बन्दै गरेको क्वारेन्टीनमा धादिङका ७ वटा स्थानीय सरकारले क्वारेन्टीनमा बस्दा अपनाउनुपर्ने विभिन्न ९ बुँदे आचारसंहिता समेत जारी गरेका छन् । 

अब क्वारेन्टीन र आइसोलेसनमा बस्नेले आचारसंहिता पालना गर्नुपर्ने र यसले अवश्य संक्रमणको जोखिम कम हुने खनियाबास गाउँपालिकाका अध्यक्ष रणबहादुर तामाङले बताए । उनले क्वारेन्टीन र आइसोलेसनको व्यवस्थापन सरकारले तोकेको मापदण्डलाई पछ्याउँदै आफ्नो भूगोल र समुदायलाई हेरेर गाउँपालिकाका जनप्रतिनिधि, स्थानीय, स्वास्थ्य संयोजक र एक्सन नेपालको टीम मिलेर व्यवस्थापन र बसाइ आचारसंहिताको निर्माण गरिएको छ । यसरी निर्माण भएको आचारसंहितालाई सातवटा पालिकाले अनुशरण गर्न थालेका छन् । 

क्वारेन्टीन र आइसोलेसनको राम्रो व्यवस्थापन गर्न सकिएन भने संक्रमणको उच्च जोखिम हुने देखिन्छ । स्थानीय सरकार नै बसाइ आचारसंहिता निर्माणदेखि क्वारेन्टीनको व्यवस्थापनमा जुट्दा क्वारेन्टीन र आइसोलेसनमा बस्नुपर्दा पनि संक्रमित र जोखिममा रहेका व्यक्तिहरू थप जोखिममा रहेको महसूस गर्न नपाउने गङ्गाजमुना गाउँपालिकाका स्वास्थ्य संयोजक दीपक अधिकारीले बताए । यसरी स्थानीय सरकारले क्वारेन्टीन निर्माण गरेको क्षेत्रमा स्वास्थ्य र सरसफाइका लागि अन्तर्राष्ट्रिय गैरसरकारी संस्था डीसीएले सहयोग पुर्‍याएको छ । 

क्वारेन्टीनमा रहने प्रत्येक व्यक्तिलाई आवश्यक पर्ने व्यक्तिगत सरसफाइ सामग्रीदेखि क्वारेन्टीनमा इन्टरनेट, टेलिभिजन, महिला र पुरुषका लागि छुट्टाछुट्टै शौचालय र स्नानघर समेत डीसीएले निर्माण गरिदिएको छ ।

यसरी व्यवस्थित भएको क्वारेन्टीनमा २ हप्ता बसेकी धादिङ ज्वालामुखीकी गोमा श्रेष्ठ आफू क्वारेन्टीनमा बसेको समय निकै सुरक्षित र व्यवस्थितसँग बिताउन पाउँदा निकै खुशी देखिन्छिन् । उनलाई पर्याप्त स्वास्थ्य सामग्री र छुट्टै बसाइ, छुट्टै शौचालय र स्नानघरको व्यवस्था भएको देख्दा निकै दंग देखिन्छिन् । उनी छिमेकी मुलुक भारतबाट फर्किएर क्वारेन्टीनमा बस्न आएकी थिइन् । पीसीआर परीक्षणको रिपोर्ट नेगेटिभ आएपछि उनी घर जाने तरखर गर्दै गर्दा आफ्नै गाउँमा आइपुगेर व्यवस्थितसँग क्वारेन्टीनमा बस्न पाउँदा र कोरोना परीक्षणपश्चात् मात्र घर फर्किन पाउँदा निकै खुशी व्यक्त गरिन् । उनले क्वारेन्टीनको व्यवस्थापनको निकै बेर प्रशंसा गरेर गइन् ।