कोरोना महामारीका कारण देखाउँदै सरेको नेपाल उद्योग वाणिज्य महासंघको बैठक आगामी मंसिर ११ र १२ गते हुने भएको छ । 

पदाधिकारी बैठकले पेस गरेको मितिलाई बिहीवार बसेको कार्यकारिणी समितिको भर्चुअल बैठकले अनुमोदन गरेसँगै निर्वाचन मिति तय भएको महासंघका कार्यकारिणी सदस्य कृष्ण दुलालले लोकान्तरलाई जानकारी दिए ।

उनले भने,‘आजको कार्यकारिणी समितिको बैठकले निर्वाचनको मिति सर्वसम्मत पारित गरेको हो ।’

उनका अनुसार, मंसिरमा मिति तय भएसँगै अब निर्वाचनको तयारी शुरू हुनेछ । 

महासंघको साधारण सभा भर्चुअल विधिबाट गर्ने र निर्वाचन काठमाडौंमा गर्ने निर्णय भएको उनले जानकारी दिए । 

यसअघि गत चैत २८ र २९ गते हुनुपर्ने महासंघको निर्वाचन कोरोना महामारी र त्यसपछिको लकडाउनले सारेको थियो । 

महासंघको विधानअनुसार वरिष्ठ उपाध्यक्ष शेखर गोल्छा स्वतः अध्यक्ष हुँदै छन् । यस्तै वरिष्ठ उपाध्यक्षमा चन्द्र ढकाल र किशोर प्रधानले उम्मेदवारी घोषणा गरिसकेका छन् ।