चीनको एक सडकमा रहेको ढलको बिर्कोमा पटका पड्काउने बालक बिर्कोसँगै हावामा उडेको दृश्य भिडियोमा कैद भएको छ । 

सीसीटीभी फूटेजमा ती बालक ढलको खाल्डोमाथि बसेर पटका पड्काउँदा त्यो अचानक उडेको र बालकलाई ठूलो शक्तिले धकेलेको देखिन्छ । 

बालक हावामा उडेर जमीनमा पछारिएको थियो तर उसलाई गम्भीर चोटपटक लागेन । 

घटना अघिल्लो शनिवार गान्सु प्रान्तको काङ्ले काउन्टीमा भएको हो । 

भिडियोमा बालबालिकाको एक समूह खेलिरहेको देखिन्छ । यत्तिकैमा एक बालक ढलतिर आउँछन् । 

उनी टुक्रुक्क बस्छन् र ढलको बिर्कोमा पटका पड्काउँछन् । अचानक पटका पड्किन्छ र उनी हावामा फनफनी उड्छन् । 

विस्फोट हुँदा अन्य दुई बालकहरू झसंग हुन्छन् र दौडिन थाल्छन् ।

विस्फोट शक्तिशाली भएकाले बालक हावामा लगभग तीन मिटर उडेका थिए । 

उडेका बालक धम्म पछारिन्छन् र यताउता हेर्छन् । 

उक्त आवासीय क्षेत्रको व्यवस्थापन कार्यालयले ती बालकलाई चोटपटक नलागेको पुष्टि गरेको छ । 

‘बालक लडे, कुनै गम्भीर घटना भएन,’ कार्यालयकी एक अधिकारीले बताइन् । ‘पटका सानो रहेछ । ठूलो भएको भए समस्या आउँथ्यो ।’

ढलमा रहेको मिथेन ग्यास बलिरहेको पटकाको सम्पर्कमा आउँदा यस्ता घटनाहरू हुने गर्छन् ।