काभ्रेको पनौती साहित्य समाजले आफ्नो संस्था १२ पूरा भएको तथा शुभ तिहार २०७७ एवं नेपाल संवत् ११४१ को उपलक्ष्यमा आफ्नो नियमित प्रकाशन यसपटक कथा विशेषाङ्कको रुपमा प्रकाशित गरेको छ । पनौती साहित्य दर्पण (भाग – ४) लाई काभ्रेली स्रष्टाहरूको कथासङ्ग्रह ‘प्रतिनिधि काभ्रेली कथा सङ्ग्रह’ को रुपमा प्रकाशित गरेको समाजका उपाध्यक्ष एवं सङ्ग्रहका प्रधान सम्पादक डा. सुमनराज ताम्राकारले जानकारी दिए ।  

उनका अनुसार ‘साहित्यका विविध विधाहरु मध्ये कथा विधामा काभ्रे निकै बलियो छ । कथा विधामा काभ्रे गर्व गर्न लायक पनि छ । किनकि नारी र पुरुष दुवै गरी शुरुवात आधुनिक कथाकारको रुपमा काभ्रेले पृथक कीर्तिमान कायम गरेको छ । काभ्रेको कानपुरमा पुर्ख्यौली घर भएका गुरु प्रसाद मैनाली नेपाली आधुनिक कथाका अगुवा हुन् । त्यसैगरी काभ्रेकै चेली तुषार मल्लिका नेपाली साहित्य इतिहासमा पहिलो नारी कथाकारको रुपमा दरिएकी छिन् ।’
कथा सङ्ग्रहमा सामाजिक कथा, पौराणिक कथा, लघुकथा, द्वन्द्व कथा, सीमान्तकृत एवम् प्रादेशिक कथाका साथै हाँस्य कथा गरी ३९ जना काभ्रेली स्रष्टाका कथाहरु समेटिएका छन् ।  यसमा अग्रजदेखि नवप्रवेशी कथाकारहरु गुरु प्रसाद मैनाली, तुषार मल्लिकाका साथै टंकनाथ शास्त्री, कृष्ण प्रसाद पराजुली, किरण खरेल, कन्हैया नासननी, ध्रुव सापकोटा, हरि अधिकारी, रमा कर्णजित, हरिवंश आचार्य, अम्बु भवानी कार्की, फूलमान बल, विजय सापकोटा, दिनमान गुर्मछान, अनामिका सजल, हिरामाया घिसिङका साथै पनौती साहित्य समाजका अधिकांश सदस्यहरूका कथा समेटिएका छन् ।