चीनको विद्युतीय व्यापार क्षेत्रमा काम गर्ने दुई कामदारको सक्नेभन्दा बढी काम गरेर मृत्यु भएको खबर आएको छ । अर्का एक कामदारले तलब नपाएको भन्दै आत्मदाह गरेका छन् । 

बढी काम गरेर मर्ने कामदारहरू पिन्डुओडुओमा कार्यरत थिए । त्यसले ताजा तरकारी र फलफूल कम मूल्यमा बेच्ने गर्थ्यो । उनीहरू लामो समय काम गर्ने गरेको र अत्यधिक दबाबमा रहेको बताइएको छ । 
 

आत्मदाह गर्ने कामदार चाहिँ अन्लाइन फूड डेलिभरी गर्ने एलेमे कम्पनीका वाहनचालक थिए । उनले बाँकी रहेको तलब दे भन्दै आफूमाथि मट्टीतेल छर्केर आगो लगाएका थिए । 

चीनका इन्टरनेट उद्योगहरूमा दिनभरि कठोर परिश्रम गर्नुपर्ने हुन्छ । लाखौं परिवार घरैमा थन्केर बस्नुपरेकाले अन्लाइन आपूर्तिको माग बढेको थियो र कामदारहरूले घरैमा सामान आपूर्ति गर्नुपरेको थियो । स्कूटरमा बढेर कठ्यांग्रिदो जाडोमा सामान पुर्‍याउन जानुपर्दा उनीहरूको स्वास्थ्य कमजोर बनेको थियो । 

प्रविधि क्षेत्रमा काम गर्ने दक्ष कामदारहरूलाई तलब त राम्रो दिइन्छ तर उनीहरूले दिनको १२ घन्टाभन्दा बढी खट्नुपर्ने हुन्छ । 

चाङ थर भएकी २२ वर्षीया कामदार उरुमकीमा काम सकेर डिसेम्बर २९ मा बिहान डेढ बजे फर्किंदै गर्दा बाटैमा ढलेकी थिइन् । त्यसको ६ घन्टापछि उनलाई अस्पतालमा मृत घोषणा गरिएको थियो । 
 

चाङको मृत्युको दुई हप्तापछि टान थर भएका अर्का कामदार गृहनगर जानका लागि बिदा लिएर आत्महत्या गरेका थिए । 

कामदारहरूको मृत्युपछि सामाजिक सञ्जालमा निकै हल्लीखल्ली भएको छ । हप्ताको ६ दिन बिहान ९ बजेदेखि राति ९ बजेसम्म काममा खटिनुपर्ने बाध्यता प्रविधि क्षेत्रका कामदारहरूलाई छ ।

कम्पनीहरूले केही कामदारलाई राम्रै बोनस दिएर ओभरटाइम काम गर्न लगाउने गरेका छन् ।