प्रेस काउन्सिल नेपालले यस वर्षको गोपालदास पत्रकारिता पुरस्कार वरिष्ठ पत्रकार भारतदत्त कोइरालालाई दिने निर्णय गरेको छ ।

काउन्सिलले सुरेन्द्रबहादुर बस्नेत पत्रकारिता पुरस्कार पोखराका बद्रीविनोद खनाल ‘प्रतीक’लाई दिने निर्णय गरेको छ ।

प्रेस काउन्सिल आचारसंहिता पुरस्कार हिमालय टाईम्स दैनिक (उज्वलशर्मा) लाई दिने निर्णय भएको काउन्सिलले जनाएको छ । 

त्यसैगरी लोकान्तर डट्कमका सम्पादक विमल गौतम र दाङका पत्रकार दुर्गालाल केसीलाई प्रेस काउन्सिल सशक्त सञ्चारकर्मी पुरस्कारबाट सम्मानित गरिने भएको छ । 

प्रेस काउन्सिल नेपालका अध्यक्ष बालकृष्ण बस्नेतको अध्यक्षतामा बसेको काउन्सिलको बोर्ड बैठकले नेपाली पत्रकारितका पुराना, पाका र अनुभवी पत्रकार कोइरालालाई यस पटक गोपालदास पत्रकारिता पुरस्कारका लागि छनौट गरेको हो ।

कोइरालाले विकास पत्रकारितामा विख्यात म्यागासेसे पुरस्कार प्राप्त गरेका थिए । नेपाली पत्रकारितामा लामो योगदान पुर्‍याएका कोइराला अन्तर्राष्ट्रिय रूपमा पनि राम्रो छवि बनाएका थोरै नेपाली पत्रकारमा पर्छन् । 

कोइरालालाई छनौट गर्ने काउन्सिलको निर्णयले राजनीतिक सिफारिस र पृष्ठभूमि बाहिरका एक अनुभवी, व्यावसायिक र दक्ष नेपाली पत्रकारको सम्मान भएको प्रतिक्रिया नेपाली पत्रकारितामा लामो अनुभव भएका सञ्चारकर्मीले दिएका छन् । कोइरालाजस्तो अन्तर्राष्ट्रिय छवि आर्जन गरेका पुराना पत्रकारलाई छनौट गर्ने काउन्सिलको निर्णय परिपक्क र विवादरहित देखिएको उनीहरूको प्रतिक्रिया छ । 

नेपाल पत्रकार महासंघका पूर्व सभापति तारानाथ दाहालले भारतदत्त कोइरालाजस्तो व्यक्तिले पुरस्कार पाउनु खुशीको कुरा भएको बताए । ‘म प्रेस काउन्सिलमा सदस्य रहेको समयमा स्थापना गरिएको गोपालदास पत्रकारिता पुरस्कारबाट भारतदत्त कोइरालाजस्तो व्यक्तिको कदर भएको छ । त्यो पुरस्कारको पनि सम्मान भएको छ,’ दाहालले लोकान्तरसँग भने, ‘कोइरालालाई छनौट गर्ने काउन्सिलको निर्णय उपयुक्त छ ।’

अनुभवी पत्रकार देवप्रकाश त्रिपाठीले पनि भारतदत्त कोइरालालाई छनौट गर्ने काउन्सिलको निर्णय उपयुक्त रहेको प्रतिक्रिया दिए । ‘भारतदत्त कोइरालाको नेपाली पत्रकारिता क्षेत्रमा उल्लेखनीय योगदान छ । काउन्सिलको निर्णयले उहाँको सम्मान भएको छ,’ त्रिपाठीले भने, ‘पछिल्ला वर्षमा राजनीतिक आस्थाका आधारमा पुरस्कारका लागि छनौट गर्ने र सबैको चित्त बुझाउने परिपाटी बस्दै गएको देखिन्छ । यसका बाबजुद कोइराला लगायतका व्यावसायिक पृष्ठभूमिका व्यक्ति काउन्सिलको छनौटमा पर्नु चाहिँ खुशीको विषय हो ।’

त्रिपाठीले पुरस्कारका लागि छनौट गर्दा नवप्रतिभालाई प्रोत्साहन मिल्ने गरी निर्णय लिन काउन्सिलको ध्यानाकर्षण समेत गराए ।

प्रेस काउन्सिल सशक्त सञ्चारकर्मी पुरस्कारका लागि छनौटमा परेका लोकान्तर डट्कमका सम्पादक गौतम २ दशकदेखि पत्रकारितामा क्रियाशिल छन् । कर्मचारीतन्त्र, न्यायालय र सुशासन विषयमा लामो समय रिपोर्टिङ गरेका गौतम खोज पत्रकारितामा विशेष दख्खल राख्छन् ।

दाङ जिल्लामा सक्रिय पत्रकार दुर्गालाल केसी खोज पत्रकारिताका साथै अध्यापन क्षेत्रमा पनि संलग्न छन् । 

प्रेस काउन्सिल भाषागत पत्रकारिता पुरस्कार गोरखापत्र दैनिकका लक्की चौधरीलाई प्रदान गरिने भएको छ । प्रेस काउन्सिल क्रियाशील पत्रकारिता पुरस्कार माधव नेपाल, विन्दुकान्त घिमिरे, बविन शर्मा, गोविन्द चौलागाई र सुशील अर्याललाई दिने निर्णय भएको छ । 

काउन्सिलको स्थापना दिवसको अवसरमा असोज ६ गते काठमाडौंमा आयोजित कार्यक्रममा पुरस्कार प्रदान गरिने छ । 

हेरौं काउन्सिलबाट पुरस्कृत हुनेको विवरण :-