नेकपा एमालेको नयाँ नेतृत्व चयनका लागि सहमतिको प्रयास चलिरहेको समयमा उपमहासचिव घनश्याम भुसालले उपाध्यक्षमा उम्मेदवारी घोषणा गरेका छन् । दशौं महाधिवेशनको बन्दसत्र शुरू हुन लाग्दा शनिवार भुसालले उपाध्यक्षमा उम्मेदवारी घोषणा गरेका हुन् । 

उपाध्यक्ष भीम रावलले भने अध्यक्षमा उम्मेदवारी दिने बताएका छन् । बन्दसत्रका लागि हलमा प्रवेश गर्नुअघि लोकान्तरसँग कुरा गर्दै रावलले उम्मेदवारीबाट पछि नहट्ने बताएका थिए । बन्दसत्र हलभित्र रावलले कार्यकर्तासँग भोट माग्न शुरू गरेका छन् । 

भुसालले उम्मेदवारी घोषणा गरिसकेको र रावलले अध्यक्षमा उम्मेदवारी दिने अडान कायम राखेपछि सर्वसम्मत नेतृत्व चयनको प्रयास सफल नहुने देखिएको छ । वरिष्ठ उपाध्यक्ष र महासचिवमा पनि अहिलेसम्म सहमति जुट्न सकेको छैन । 

‘अध्यक्षको उम्मेदवारी दिन्छु, प्रतिनिधिसँग कुरा गरिरहेको छु, प्रत्येकलाई चिन्छु । विधि पद्धतिमा विश्वास गर्ने सबैले मलाइ समर्थन गर्नुहुन्छ,’ रावलले भने । 

१८ पदमा सहमति भएर अध्यक्ष मात्र बाँकी रहेको अवस्थामा के गर्नुहुन्छ भन्ने जिज्ञासामा रावलले भने, ‘म राजनीतिमा काल्पनिक भन्दा पनि यथार्थ कुरा गर्छु, त्यतिबेला सहमति भएछ भने तपाईंहरूसँग फेरि कुरा गर्छु ।’

वरिष्ठ उपाध्यक्षको लागि ईश्वर पोखरेल र सुवास नेम्वाङ तथा महासचिवका लागि विष्णु पौडेल, शंकर पोखरेल र सुरेन्द्र पाण्डेले दाबी गरिरहेका छन् । सहमतिको प्रयास स्वरुप अध्यक्ष केपी शर्मा ओलीले नेताहरूसँग परामर्श गरेका थिए । 

नेतृत्वमा सहमति कायम गर्न भन्दै एमालेले शुक्रवार मध्यरातमा केन्द्रीय कमिटी बैठक राखेर पदाधिकारीको संख्या बढाउने र केन्द्रीय सदस्यको संस्था थप गर्ने निर्णय गरेको थियो । केन्द्रीय कमिटीबाट शुक्रवार पारित प्रस्तावलाई विधान संशोधन प्रस्तावको रुपमा बन्दसत्रमा पेश गरिँदैछ ।

विधान संशोधन प्रक्रिया सकिएपछि निर्वाचन प्रक्रिया शुरू हुनेछ । नेताहरूले अझै पनि सहमति जुट्ने सम्भावना रहेको बताएका छन् । प्रदेश १ का पूर्व मुख्यमन्त्री शेरधन राईले नेतृत्व चयनका लागि मतदान हुने 'चान्स' नभएको बताए ।

झण्डै ५ घण्टा ढिलो गरी शुरू बन्दसत्रमा अहिले विदेशी प्रतिनिधिले सम्बोधन गरिरहेका छन् । नयाँ नेतृत्व चयन गर्दै एमाले महाधिवेशन भोलि सक्ने तयारी छ ।