बहराइनमा जारी एसियन युथ पारा ब्याडमिन्टन प्रतियोगितामा नेपाली पारा ब्याडमिन्टन खेलाडी प्रकाश अधिकारीको यात्रा क्वार्टर फाइनल पुगेर टुंगिएको छ ।

आइतबार भएको क्वाटरफाइनल खेलमा अधिकारी कोरियाका खेलाडीसँग २१–०७ तथा २१–०७ को सोझो सेटमा पराजित भएका हुन् ।

प्रकाशले भारत र युएईका खेलाडीलाई हराएर क्वार्टर फाइनल यात्रा तय गरेका थिए ।

सुर्खेतका प्रकाशलाई काठमाडौंमा कोच सुदीप योञ्जन तालिम दिने गरेका छन् । 

"क्वार्टर फाइनलमा पराजित भए पनि यहाँसम्म पुग्नु ठूलो कुरा हो, आउने दिनमा सुधार गर्दै जाने अपेक्षा गरेको छु,' कोच योञ्जनले भने ।

अधिकारी नेपालबाट अन्तर्राष्ट्रिय स्तरमा प्रतिस्पर्धा गर्ने पहिलो पारा ब्याडमिन्टन खेलाडी हुन् । 

उनको शरीरको दायाँ साइडमा जन्मजात समस्या छ । तै पनि बायाँ हातको भरमा निकै आकर्षक खेल खेल्न सक्षम छन् ।