कांग्रेस कम्युनिस्टभन्दा किन पछि पर्‍यो भन्ने समीक्षा गरे मात्र महाधिवेशनको सार्थकता हुन्छ– पौडेल

नेपाली कांग्रेसका वरिष्ठ नेता रामचन्द्र पौडेलले महाधिवेशन उद्घाटन समारोहको मञ्चबाट पार्टी नेतृत्व र सरकारको आलोचना गरेका छन् ।

कांग्रेसको १४ औं महाधिवेशन उद्घाटन समारोहलाई शुक्रवार भृकुटीमण्डपमा सम्बोधन गर्दै पौडेलले पार्टी कमजोर र सरकार गतिहीन अवस्थामा रहेको बताएका हुन् ।

'हेर्दा नेपाल गतिहीन र अवरुद्ध अवस्थामा छ । संसदमा जुन किसिमको बन्द अवस्था छ । सर्वोच्च अस्तव्यस्त छ । सरकार गतिहीन अवस्थामा छ । पार्टीहरू अस्तव्यस्त छन्,' पौडेलले भने, 'के कारणले कम्युनिस्टभन्दा कांग्रेस पछि पर्‍यो भन्ने कुराको समीक्षा गरे मात्र १४ औं महाधिवेशनको सार्थकता हुनेछ ।'

उनले नेताले कार्यकर्ता र कार्यकर्ताले नेताको मूल्यांकन गरेर अगाडि बढ्नुपर्ने बताए ।

'नेतृत्वले कार्यकर्ताको मूल्यांकन गर्नुपर्छ । कार्यकर्ताले पनि नेतृत्वको मूल्यांकन गर्ने साहस गर्नुपर्छ,' पौडेलले भने, 'हाम्रो गति रोकिएको छ । पार्टीलाई अब अगाडि बढाउनुपर्ने छ ।'

उनले पार्टीभित्रको आन्तरिक एकताका लागि आफू जहिले पनि लडेको बताए । आफू अपमानित भएर पनि पार्टीलाई एक बनाउन भूमिका खेल्दै आएको उनको भनाइ थियो ।