लगातार  साताको तेस्रो दिनमा पनि शेयर बजार ओरालो लाग्यो ।

मङ्गलबार नेप्से ५.५९ अङ्कले ओरालो लागेर  २८१५.०६  को  बिन्दुमा  रोकिएको  छ ।

'क’  वर्गका  कम्पनीमापक  सेन्सेटिभ  इन्डेक्स पनि  १.०९  अङ्कले  ओरालो  लागेर  ५२४.९४ को   बिन्दुमा   रोकिएको   छ ।

 यो   साताको आइतबार  नेप्से  परिसूचकमा  १०.८३  अङ्कले र सोमबार ९९.८६ अङ्कले घटेको थियो ।

मङ्गलबार  कुल  २२९  कम्पनीका  ९७ लाख  ८४  हजार  ६१५  कित्ता  शेयर  किनबेच हुँदा पाँच अर्ब ३९ करोड ५६ लाख ७२ हजार ६२७ रुपैयाँको कारोबार भएको छ ।

जीवन   बीमा   समूहबाहेक   कारोबारमा आएका सबै समूहकोे परिसूचक ओरालो लागेर बजार बन्द भएको हो ।

जीवन बीमा समूहको परिसूचक   भने   ७२.१६   अङ्कले   उकालो लागेको  छ ।  कारोबारका  आधारमा  एसियन लाइफ  इन्स्योरेन्स  कम्पनी  अग्रस्थानमा  रहेको छ ।

कम्पनीको २६ करोड ९४ लाख ५१ हजार रुपैयाँभन्दा  बढीको  कारोबार  हुँदा  अन्तिम शेयर  मूल्य  एक  हजार  ३२२  रुपैयाँ  कायम भएको  छ ।  त्यस्तै,  अपी  पावर  कम्पनीको २२  करोड  ८२  लाख  ५५  हजार  रुपैयाँभन्दा बढीको  कारोबार  हुँदा  अन्तिम  शेयर  मूल्य ५२० रुपैयाँ कायम भएको छ ।

उच्च कारोबार गर्ने अन्य कम्पनीमा एनआईसी एसिया बैङ्क, नेपाल  लाइफ  इन्स्योरेन्स  कम्पनी,  नेसनल हाइड्रोपावर  कम्पनी  रहेको  छ ।

 मङ्गलबारको कारोबारबाट  अधिक  आम्दानी  गर्ने  कम्पनीमा विन  नेपाल  लघुवित्त  वित्तीय  संस्था,  बुद्धभूमि नेपाल हाइड्रोपावर कम्पनी रहेको छ । गोरखापत्र दैनिकमा खबर छ ।