केन्द्रदेखि प्रदेशका संसदमा अवरोध गरिरहेको नेकपा एमालेले कर्णाली प्रदेश सभाको बैठक सञ्चालनमा सहयोग गरेको छ । 

आइतवार शुरू कर्णाली प्रदेश सभाको अधिवेशनमा एमालेले बैठक चलाउन सघाएको हो । 

आइतवार बसेको प्रदेश सभा बैठकको पहिलो बैठकमा नेकपा एमाले संसदीय दलका नेता यामलाल कँडेलले एमालेले उठाउने कैयौँ विषय बाँकी रहे पनि सदन सञ्चालनमा सघाउन तयार रहेको बताए । 

कँडेलले जनमतको दबाबका कारण हिजोदेखि स्थानीय तहको चुनाव हुने परिस्थिति देखिएको बताए । ‘स्थानीय तहको समयावधि सकिँदै थियो, गठबन्धनले सचेततापूर्वक चुनाव सार्ने प्रयत्न गरिएको थियो । जनमतको दबाबका कारण समयमा चुनाव हुन्छ कि भन्ने परिस्थिति भएको छ,’ कँडेलले भने, ‘हामी एक्लै चुनाव लड्न तयार छौं । स्थानीय तह एक दिन पनि खाली नगर्ने कुरामा लागौँ । चुनावमा कसैको हारजित भए पनि लोकतन्त्रले हार्ने छैन ।’

राजनीतिक दलसम्बन्धी अध्यादेश ल्याएर पार्टी विभाजन गरिएको भन्दै एमालेले केन्द्रदेखि प्रदेशसम्मका संसद अवरुद्ध गर्दै आएको छ । 

‘नेकपाको सरकार छँदा केपी ओलीले ४० प्रतिशतको व्यवस्थासहित अध्यादेश ल्याइएकोमा जनमतको विरोधका कारण फिर्ता भएको थियो । अहिलेको सरकारले २० प्रतिशतको अध्यादेशले गर्दा धोकाधडीपूर्ण ढंगले एमाले विभाजन गरियो,’ कँडेलले भने । 

कर्णाली प्रदेश सभामा एमालेले मुख्यमन्त्री रोजगार कार्यक्रमका नाममा बजेटको व्यापक दुरुपयोग भएको आरोप लगाएको छ ।